Shillong, Risaw 02 : Ka myntri ka koit ka khiah ka Dr M Ampareen Lyngdoh ka la ïashimbynta ha ka National Voluntary Blood Donation Day, kaba la pynlong ha Nazareth Hospital, Laitumkhrah, Shillong mynta ka Sngi Nyngkong.
Ka Myntri kala kyntu ïa ki nongshong shnong ka jylla ba kin mih shakhmat ha kane ka mission kaba kongsan ban pynthikna ba ka Ayushman Bhav bad ka Sewa Pakhwada kan ngam ha man la ki ïing bad ha kyndong kynshrot jongka jylla.
Ka jingai ïa ka snam na ka bynta jingsumar kaba kyrkieh ka long kaba kongsan bha kum ka jingnoh synnianng sngewbha ban pynthikna ba ki nongshong shnong kin ïoh jingmyntoi shisha na ka jingïoh jingsumar kaba Salonsar ïa baroh. Ka snam ba kordor kaba la noh da baroh ki blood donating organization kiba la ïoh ïa ka jingithuh haduh ki blood storage centers kiba la ïoh jingithuh ka long kaba kongsan bha ïa ka jingim ki briew ha ka jylla Meghalaya.
Ka la ong ba ka jingnoh synniang ïa ka snam ha kane ka jylla ka long kaba duna bha kaba poi tang 18 % ha ka jylla baroh kawei haba ïanujor bad ka 100% jongka National Average.
Ka imlang sahlang ka hap ban mih shakhmat bad ban ïar ka jingmut jingpyrkhat ban sdang ïa ka jingnoh synniang tista ïa ka snam.
Ki khana bad ki jingsngewthuh bakla halor ka jingai snam ka dei ka bynta kaba la ktah bha ïa ka jingnoh synniang ha ka jylla Meghalaya.
Haba kynmaw burom ïa u Mahatma Gandhi u Kpa jong ka ri bad u nongïakhun ban pynïoh ïa ka jinglaitluid ka ri, ka Kong Ampareen ka la ai jingïaroh ïa ka synniang kaba khraw jong une u nongïalam ba radbah ka ri bad ka long kaba ïahap bha ban pynlong ïa kane ka prokram ha kane ka sngi ha kylleng ka ri.
Ha kane ka program la ïaroh bad ai jingithuh ïa ka jingnoh synniang jong baroh bad ïa palat 45 tylli ki blood donation organizations ha kylleng jong ka East Khasi Hills bad Ri Bhoi Districts, ki la shah pynkup burom bad ka jingïalang ka la shim ruh ïa ka smai ban kular bad shim ïa ka jingkitkhlieh ban pynpawnam ïa ka jingnoh synniang ïa ka snam.
