Nongpoh, Jymmang, 02: U Bah Damanbait Lamare MLA ka Umroi mynta ka sngi u la aiti da ka kali kit nongpang sha ka Dorbar Shnong Mawtneng, bad ruh ban plie paidbah ruh ïa ka kamra klas ba thymmai jong ka Mawtneng Secondary School bad kumjuh ka jaka leit shabar jong katei ka skul bala mang pisa lyngba ka Chief Minister Special Development Fund.
Ha katei ka sngi ka jingplie paidbah ïa kitei ki kam pynroi la sakhi ruh da ka jingdonlang u Bah Forster Sohiong, Rangbah Shnong Mawtneng, Kitbok Kharlukhi, Secretary Shnong, u Pastor R.S Lamare lem bad kiwei kiwei ki riew Rangbah jong katei ka Shnong.
Haba kren ha katei ka sngi na ka liang u Bah Damanbait Lamare u la pynpaw ka jingsngewkmen bala ïoh ban aiti ïa ki jingdonkam jong ka shnong Mawtneng naduh ka Ambulance, ka building skul ba thymmai bad kumjuh ruh ka jaka leit shabar jong ka Mawtneng Secondary School na ka bynta ban pynsuk ïa ki khynnah skul ryngkat ka jingkular ruh ba nangne shakhmat un dang trei shitom shuh shuh, na bynta ban wanrah ïa ka jingkylla bad ka roi ka par ha ki shnong bapher bapher kiba hap ha Umroi Constituency.
U la kyntu ruh ïa ki paidbah hapoh katei ka shnong, ba ki dei ban sumar bha ïa ki, khnang ba kin long neh bad long ka jingkyrkhu ïa ki paidbah ha katei ka shnong.
