Jurip u Myntri ïa ka Captain Williamson Sangma State University, lap ba dang suki ki kam jingtei

By Mawphor Editor On May 3, 2025

Shillong, Jymmang 02: U Myntri ka tnat Pule Puthi ka sorkar jylla u Rakkam A Sangma ha ka sngi Thohdieng u la leit ban jurip ïa ka kam kaba dang trei jong ka Captain Williamson Sangma State University hapoh ka campus jong ka university kaba don ha ka shnong Balalgre.
Ha kane ka jingleit jurip la synran lang ïa u da u Subir Marak, MLA ka Rangsakona Assembly Constituency, bad u Bah HM Shangpliang, nong aibuit jogn ka tnat Pule Puthi.
Ha kane ka jingjurip u Myntri, u la pynlong ruh ïa ka jingbishar kam ïa ki jingtei kiba la ïaid shaphrang hapoh ka campus, bad ha kane ka jingjurip la donlang ki ophisar na ka tnat Education, kumjuh ruh ki engineer bad ki heh ophisar na ka tnat PHE, PWD (R&B), Power, bad BSNL.
Ha kane ka jingjurip la ïakren halor ki kam jingtei kiba hab hapoh ka tnat PHE kiba dang dei ban sdang. La ong ba ïa ka borewell, ha ryngkat bad ka treatment plant bad kiwei pat ki jingtei la khmih lynti ban pyndep hapoh kane ka snem. La ïakren ruh halor ka jingpynpoi um kaba shipor sha kane ka jaka. La khmih bniah ruh ïa kawei ka wah duid kaba don hapoh ka campus ha kaba na ka liang Executive Engineer, u la bthah ban pynkhreh ïa ka mang pisa kaba dei ban leh noh kloi. La ïathuh ruh ba ka jingpynpoi um kaba shipor la dei ban pyndep noh hapoh ka 2 bnai ha shwa ban sdang ka snem pule kaba dei ha u bnai Nailar mynta u snem.
La ïathuh ba kumba ka long mynta ïa ka jingpynpoi ïa ka um hapoh ka campus la shu tan shipor lyngba u generator. Watla T. 44 lak la dep ban mang na ka bynta ban pynpoi ïa ka bording, hynrei ïa kane ka kam ym pat ban sdang. Na ka liang ki ophisar ka tnat bording ki la pynthikna ba ka jingpynpoi ïa ka bording yn lah ban pyndep hapoh ka shi bnai hadien ba la ïoh ïa ka jingmang pisa. Halor kane u Myntri ka sorkar jylla u la bthah ïa ka tnat ba ka dei ban sdang noh mardor ïa ka kam. La ïathuh ruh ba la hap ban pynkiew ïa ka dor jong ka jingmang pisa da 5% na ka daw jong ka jingkut noh ka por ban pyntrei ïa ka kam kumba la aiti ïa ka original estimate.
Ïa ka kynroh jong kane ka campus la pyndep kaba long ruh katkum ka originally acquired 90 bighas jong ka jaka. Hynrei kumba 50-60 bighas ka jaka ka dei shabar u pud u sam ka campus. Haba ïadei pat bad ka jingdon jong ka jaka hapoh kane ka campus na ka liang ka tnat kan sa ai ïa ka jingmang pisa kaba dei katkum ka jingdonkam. Shuh shuh la ïathuh ruh ba yn sa pynkhreh ruh ïa ka jingmang pisa na ka bynta ki surok shnong kiba don hajan kane ka campus.
Na ka liang ki heh ka BSNL ki la ïathuh ba ka jingthep ïa ki waïar shapoh khyndew la dep ban leh haduh Garobadha. Yn sa buh ruh ïa ki router, hotspot, firewall, bad cybersecurity. La khmih lynti ruh ba baroh ki kam yn pyndep hapoh ka shibnai hadien ba la pynlait ïa ka pisa ba la mang.
La ïathuh ruh ba ïa kane ka jaka ha kaba sdang la shim na ka bynta ban tei ïa ka medical college bad na ka daw jong ka jingïaid ka por ki la don ruh ki jingbym ïaid beit jong ki kam haba ïadei bad ki kot ki sla. La bthah ruh ïa u Additional Deputy Commissioner (ADC) ka West Garo Hills ban pynshisha bad ban pyntip haba ïadei bad ki record. Na ka liang u MLA ka thaiñ u la shim khia ruh ban pynsuk ïa ka jingjurip jaka da ka jingkyrshan lang ki nongshong shnong kiba la ai ïa ka jaka. Na ka jingjurip la pynpaw ba baroh ka jaka ban tei ïa ka university ka heh kumba 285 bighas.
Na ka liang u Registrar u la ïathuh ruh ba ka jingtei na ka bynta ka College of Architecture bad Urban Planning la dep ban pyndep hynrei kumba ka long mynta ïa kane ka jaka khlem da pyndonkam. Naba dang ap ïa ka jingmynjur na ka Council of Architecture bad AICTE, ka la don ruh ka jingkyrpad ban pynhab ïa kane ka jingtei hapoh ka jingkhmih ka university na ka bynta ban pyndonkam shipor haba ïadei bad ka Science Block, kaba ka university ka la thmu ban pyntreikam noh ha u snem ban wan.
Katba u nongai buit jong ka tnat u la ai jingmut ban thaw noh ïa ka Coordination Committee, ban pynïaid da u D. D. Sangma, Secretary ka sorkar jylla, ka tnat Pule Puthi bad ki dkhot kin kynthup ïa Deputy Commissioners ka West Garo Hills bad South West Garo Hills, bad kumjuh ruh ki nongmihkhmat na ki tnat kum ka PWD (R&B), PHE, Power, bad BSNL.