Shillong, Naiwieng 01: Kumba ju long manla u snem ha kane ka snem kaba mynta ruh la ïohi ïa ka jingthnam ka ïew die syntiew ha Motphran na ka bynta ka jingpynlong ïa ka sngi burom kynmaw ïa kiba la khlad noh ne ka All Souls Day kaba la pynlong lyngba ka jinglehniam da ka Balang Katholik manla u snem.
Ki paidbah kiba thmu ban leit buh ïa ki syntiew sha ki lum jingtep jong kiba ieid ba thoiñ kiba la khlad noh hapoh ki lum jingtep bapher bapher jong ki parish ka Balang Katholik ki ban leit buh ïa ki syntiew ha ka sngi u Blei jong une u bnai Naiwieng.
Ha ka sngi Saitjaiñ la ïohi ba ka Motphran ka la dap da ka jingphuh jingphieng bad sma iwbih na ka jingdon jong kiba bun ki nongdie ïa ki syntiew kiba wan na ki distrik bapher bapher.
Watla kane ka jingkynmaw tympang ïa kiba la khlad noh, la ju leh beit tang da ka Balang Katholik ban duwai bad kynmaw ïa kiba la khlad noh, hynrei la ju shem pat ba wat ki paid riewngeit jong kiwei pat ki kynhun Balang kiba ju leit buh ruh ïa ki syntiew sha ki lum jingtep jong kiba ieid ba thoiñ ha ki lum jingtep ba kyntang jong ki parish bapher bapher.
Lah ïohi ruh ba ka Motphran ha kane ka sngi ka la kham ngiah hi smam da kiba die syntiew kiba shong tawiar jong ka pdeng surok Motphran bad sha kyndong surok ruh.
Nalor ka jingkhapngiah ka surok na ka jingdon bun ki kali kiba ïatynruh hynrei ka la nang khapngiah shuh da ka jingdon kiba die syntiew.
Ha kawei pat ka liang lah ban ong ba kane ka jingdie ïa ki syntiew ka la plie lad ha ka ïoh kam ïoh jam ïa ki nongshong shnong lyngba ka kam thung bad rep syntiew bad ha kane ka sngi Saitjaiñ ruh la ïohi ba bun bha ki paidbah ki la ïa thied ïa ki syntiew ba la die ha Motphran.
