Shillong, Nailur 17: Ka Hynñiewtrep Integrated Territorial Organization (HITO) West Jaiñtia Hills ha ka sngi baar ka la kyntu ïa ki 4 ngut ki MLA ka thaiñ Jaiñtia ban pynbor ïa ka Sorkar ba kan tei noh ïa ka nursing school ha Jowai, kaba dei ka district headquarter.
Hadien ka jingïakynduh bad ka Myntri ka Koit ka Khiah ka sorkar ka kong Ampareen Lyngdoh, u President ka HITO u Owansakhi Pasweth u la ong, “Ngi kyntu ïa baroh ki nongthaw aiñ ban pynthikna ba ka sorkar ban pynurlong ïa ki jingkular ban tei ïa ka nursing school ha Jowai.”
“Ïa ka nursing school ha kaba sdang la tyrwa ban tei ha u snem 2012 ha Jowai hynrei katkum ka jingtip, ka sorkar mynta ka la rah noh ïa kane sha Baghmara,” u la ong.
“Baroh 4 ngut ki MLA khamtam u Bah Wailadmiki Shylla MLA ka Jowai ba dei ban shim ka jingkitkhlieh ïa kane ka kam lada mih ka huri hura ne ka jingïakhih pyrshah haba ïadei bad ka jingrah noh ïa kane ka project sha Garo Hills,” u la bynrap.
Ha ka dorkhas u Pasweth u la ong, “Ngi ngeit ba ka Jowai, kaba dei ka sor kaba heh ha ka district ka don hok ban ïoh ïa ka nursing school ban lah ban ïarap ïa ki jingdonkam na ka bynta ki samla pule jong ngi.”
“Baroh ki district ba kongsan ha Meghalaya ki la don la ki jong ki nursing school, hynrei ha Jowai, nalor ba kadei ka sor kaba kongsan, kam don ïa kane ka skul. Ïa kane ka kam, dei ban shim khia da baroh. Ka Jowai ka don ki jaka sumar kiba biang ki jingtei bad ki hospital, ka general ward, MCH bad ka civil hospital, kaba dei ban pynbiang ïa ki lad ai jinghikai kiba long katkum ki syllabus,” u la ong da kaba kyntu ïa ka sorkar ban pyrkhat ïa kane ka jingai jingmut kaba long kaba donkam na ka bynta ki samla pule kiba thrang ban leit ïa kane ka jingpule.”
Shuh shuh ka HITO ka la ong ba ka Myntri ka dei ban tuklar ïa ka jingduna kine ki lad bad ki tiar ki tar ha Jowai civil hospital.
“Ka HITO ka kyrpad ruh ïa ka Myntri ban shim khia ruh halor ka jingduna ki nongtrei ba kynthup ïa ki doctor bad nurse ha civil hospital bad ka MCH hospital.
