Shillong, Nailur, 17: Ka Thma u Rangli Juki ka la kyntu bad kyrpad ïa ki paralok nongpynmih khubor, ki nongthoh kot khubor bad ki trai jong ki lad pathai khubor bad ïa kiba thaw ne pynwandur khubor (content creators) ban ieng pyrshah ïa ka Meghalaya Communication Policy 2024 bad ïa ka jingpynbna (Notification) ba la pynmih da ka Sorkar Meghalaya.
“Kane ka hukum ka bthah bad dawa ïa kino kino ki nongshong shnong kiba pynmih kino kino ki khubor ne ki jingthoh kiba long kum ki khubor ba ki dei ban register bad ka tnat pathai khubor jong ka Sorkar Jylla ne ka Directorate of Information and Public Relations,” ong ka TUR ha u kyrwoh ba la phah ha ka sngi Baar da ka Convenor ka Kong Angela Rngad sha ki lad pathai khubor.
“Kane ka notification ne hukum ka long be -aiñ. Kane ka hukum jong ka Sorkar Jylla ka long pyrshah ïa ka hok jong ki nongshong shnong ban kren ne pynpaw laitluid bad ruh ka long pyrshah ïa ka hok jong ki nongthoh kot khubor ne nongpynmih khubor ne ka Press Freedom kaba la saiñdur ha ka Riti Synshar ka Ri India. Nalor nangta ka policy kam dei ka Aiñ bad ka policy ka dei tang ki jingkdew bad kumta kam don ïa ka bor jong ka Aiñ. Kaba sngewsih ka long ba ka Sorkar Meghalaya ka leh kum bym sngewthuh ïa kata,” la ong ka TUR.
“Shuh shuh, kane ka policy thymmai, ka Meghalaya Communications policy 2024 ka ai bor palat pud ïa ka Sorkar ba kan thew bad rai kut tang ma ka hi ïa kino ki khubor kiba mih kiba lah ban ktah ïa Sorkar Jylla, ka shongsuk shongshngaiñ, ka akor lane kaba ktah ïa ka raiñ ka rem ki riewshimet. Kane ka Policy ka aibor kut ïa ka Sorkar Jylla ban rai bad ka lah ban long ba kum ïa kane ka jingkyrpad ba ka TUR ka phah sha ki paralok nongthoh khubor, ka Sorkar Meghalaya ka lah ban ñiew ba ka dei ka jingpynshit ïa ki nongthoh khubor bad lad pathai khubor ban ieng pyrshah ïa ka Sorkar,” la ong shuh shuh ka TUR.
“Ka long kaba kongsan ban pynkynmaw hangne ba ka Sorkar Pdeng ka la hap ban pynsangeh bad buh shuwa sharud ïa ka Aiñ-rew kaba ïadei bad ki kam pathai khubor ne kata ka Broadcasting Bill namar kane ruh ka ktah palat ïa ka ka jinglaitluid ki nongthoh, ki nongpynmih khubor bad ki lad pathai khubor. Kumta bun kiba ieng pyrshah ïa kane ka Aiñ rew. Ka long ruh kaba kyndit ba kumno ka Sorkar Jylla Meghalaya ka tuklar marwei ïa kane ka subject kaba hap ha ka Concurrent List ne ka thup ba ka Sorkar Pdeng ruh ka don ka bor ban thaw Aiñ. Kaba ma mynta ka long ba ki paidbah kiba kynthoh pyrshah ïa ka jingbamsap ka Sorkar Meghalaya ha ki rynsan Social Media kin shah pynshitom katkum kane ka policy thymmai. Hato kane kam ktah ïa ka hok ban kren laitluid?” la buh jingkylli ka TUR.
“Ka pynlyngngoh ruh ïa ngi ba ym shym don kiba pyrshah ïa kane ka policy thymmai ka Sorkar Meghalaya ha ka por ba pun ïa ka, wat ki nongthoh khubor bad lad pathai khubor ruh kim shym pynpaw eiei. Kane ka Meghalaya Communications Policy 2024 kam ktah tang ïa ka hok ban kren, ban kdew laitluid bad ban thoh khubor laitluid hynrei ka ktah ruh ïa ka hok kaba ngi ki nongshong shnong ngi ïoh lyngba ka Right to Information Act 2005,” la kynthoh ka TUR.
“Kumta ka TUR ka kyntu bad kyrpad ïa ki paralok nongthoh, nongpynmih khubor bad ki kynhun lad pathai khubor ban ieng pyrshah ïa kane ka policy bad ïa ka hukum jong ka Sorkar Jylla Meghalaya halor ka kam pynmih khubor,” ong ka TUR.
