Jowai, Jymmang 23: Kiba bun ki riew paidbah bad ki samla pule, ki la ïoh jingmyntoi na kane ka prokram ai jingsumar ei ba la pynlong da ka Society for Urban and Rural Empowerment (SURE), ha ryngkat ka jingïatreilang ka Project Regeneration Meghalaya.
Ïa kane ka prokram la pynlong ha Amlarem Secondary School, Amlarem ba la wan kyrshanlang da ki nongtrei jong ka Jaraiñ PHC hapoh ka jinïalam jong u Dr. F. Lamin.
U Dr. S.N. U Goswami, Chief Operating Officer ka Project Regeneration Meghalaya, haba ai jingkren ula batai lyngkot halor kane ka projek bad ka jingthmu jong kane ka projek – ban pynthymmai ïa ka khyndew bad ka mariang jong ka jylla da kaba thung ïa ki dieng. Ula kdew ba bun ki kur ki jait bad ki jaidbynriew ha ka jylla ki la sdang ban ïatreilang bad ka Project da kaba ailad ïa ka ban thung dieng ha ki jaka ba rben.
U Rev. F. Pohshngap, Secretary jong ka kur Pohshngap haba kren ula ïaroh ïa kane ka Projek bad u la pynpaw ka jingkyrmen ba kane ka projek kan long kaba jop. U Pastor Pohshngap ula ong ba kane ka projek ka long kaba kyrpang namar ba ki trai jaka ki don bynta ha kaba thmu bad pyntreikam ïa kane ka jingthmu lyngba ka jingpynrung ïa ki ha ka Multi-Stakeholders Platform.
U Dr. F. Lamin uba dei u Medical Officer ka Jaraiñ PHC ula kren halor ki jingeh haka liang ka koit ka khiah kaba ktah ïa kane ka thaiñ. Ula pynpaw ïa ka jingsngewkhia kaba jur halor ka jingkiew jong ki nongpang HIV ha ka thaiñ Amlarem. Ula pynpaw ruh ïa kawei pat ka jingeh kaba khraw, kata ka jingkha khun ha ka rta kaba dang rit bad u la kyntu ïa ki samla pule ban long kiba sngewthuh halor kane ka bynta
U Dr. Ajay Sharma uba dei u Director jong ka Corporate and State Affairs jong ka AstraZeneca India ula ong ba ka kompeni ka sngewkmen shibun eh ban don bynta lang haka Project Regeneration Meghalaya, kaba la pyntreikam ha Meghalaya bad u kyrmen ba kine ki jingpyrshang kin lah ban ïarap ban ïakhun pyrshah ïa ka jingkylla ka suiñbneng.
Ula ong lyngba kane ka projek yn thung haduh 6 klur tylli ki tynrai dieng ha ka Jylla. Hadien kata u Dr. Sharma ula leit jngoh ïa katei ka jaka thung jingthung kaba don hajan Amlarem, kaba dei jong ka jait Dhar Sohtken. Ula leit ïa kynduh ruh ïa ka nongsumar jong ka kur ka Kong Duwan Dhar.
Kiwei pat kiba la ai jingkren ha kane ka sngi ki kynthup ïa ka Coriniki Slong kaba dei ka District Resource Person bad ka kong Banisha Lamar ka Zonal Supervisor jong ka Link Workers Scheme kaba hap hapoh ka SURE.
