Nongpoh, Jymmang 23: Ka Society for Community Mobilization for Sustainable Development (MOBILIZATION), New Delhi ryngkat ka jingïatreilang bad ka Central Agricultural University, Imphal mynta ka sngi ka la sdang ïa ka National Seminar ba 3 sngi lynter halor ka phang ‘Futuristic Agriculture: Technology, Sustainable and Beyond’ ban ïathir ïatai halor ka lawei jong ka rep ka riang ban dang kyntiew shuh shuh lyngba ka jingpyndonkam ïa ki kor ki bor katkum ka juk stad ba mynta ba ka ri jong ngi kan pahuh haki mar rep bad ki mar bam.
Ha katei ka National Seminar ba la pynlong ha College of Post Graduate Studies in Agricultural Sciences, Umïam la sdang ruh da ka jingthang sharak ba la wan ban shim bynta da u Dr Sanjay Kumar Chairman ka ASRB, New Delhi kum u kongsan ha ka jingdonlang ki heh ophisar ka rep ka riang, ki khraw pyrkhat, ki nongrep nakylleng ka ri India kiba la kiew shaphrang ha ka rep ka riang bad kiwei kiwei.
Haba kren ha katei ka sngi na ka liang u Sanjay Kumar kum u kongsan u la ong lyngba kane ka sngi ngi ïohi ïa ka jingkiew ka rep ka riang ha ka ri India baroh kawei, kaba riewspah ha ka jingpynmih ïa ki mar rep ba bun jait ba donkam ban dang pynjanai ïa ka rep ka riang ha ka ri da ka ba pyndonkam ruh ryngkat bad ka jingstad katkum ka juk ba mynta.
U la ong ruh ba ki mar rep ki dei ruh ban don la ka jong ka jingithuh ba kyrpang bad khamtam ki ja ka pynïaid iew kiba biang ban pynsuk ïa ki nongrep bad kumjuh ruh ki nongthied nongpet, ryngkat ka jingkyntu ba donkam ban pynkupbor haki samla ka ri ryngkat ka jingkyrshan ba kin lah ban sdang ïa kano kano ka kam rep kum ka lad kamai ban ieng hala ki jong ki kjat bad khamtam kan long ka stieh ïa ka ri baroh kawei ban lait na ka jingkyrduh bam.
Kiwei kiwei kiba la ïa don lang ha kane ka sngi, ki kynthup ïa u Dr. Rajvir Singh, DDG (Agricultural Extension), Dr. P.S. Pandey (VC- RP CAU), Dr. B.R. Kamboj (VC-HAU), Dr. J.P. Sharma (Ex- VC- SKUAST Jammu), Dr. P.K. Chakraborty (Ex-Member ASRB), Dr. M.C. Sharma (Ex- VC- IVRI), U Atul Jain, General Secretary Pandit Deendayal Shodh Sansthan bad ki nongrep na kylleng ka thaiñ Shatei lam Mihngi ka ri India.
