Shillong, Naiwieng 07: Ka Joint Action Coammittee jong ka North Eastern Hill University kaba dei ka Synjuk ïatreilang ka seng ki Nonghikai, ki Samla pule bad ki nongtrei ka NEHU, ka la khot ïa ka jingïalang bad ki nongthoh khubor ha ka 8 tarik mynta u bnai ha Shillong Press Club ban thad madan ïa ki kam beaiñ jong u Vice Chancellor, u Prof PS Shukla.
Katkum ka kyrwoh ba la phah da u Prof L. Kma, President bad u Bah JP Nongbri, General Secretary la ong ba kawei na kine ki kam beaiñ jong u Prof Shukla kum u VC ka NEHU, kadei ka jingthungkam ïa u Rohit Prasad kum u Technical Officer/Senior Consultant ka University kaba long ka jingthung ka bym don jingkyrshan eiei na ki kyndon treikam jong ka UGC.
“Ha ka 3 tarik mynta u bnai, ngi la pynshai bad kyntait lut ïa ki jingkam u VC ha kaba ïadei bad ka jingthungkam jong u VC ïa u Prasad, kaba long ka jingkam kaba shu kren khlem nongrim bad kren khyllung”, la ong ka kyrwoh jong ka JAC.
Nalor kane ka kam, ka JAC kan sei lut ruh ïa ki kam beaiñ jong u VC kiba u la leh ha kine ki arsnem naduh ba u la shimti kum u VC ka University. “Ngin sei ruh ryngkat ki kot ki sla kiba biang”, la ong ka kyrwoh na ka JAC, kaba la khot ïa ka jingïalang bad ki nongthoh khubor ha ka por 3:30 janmiet ha Shillong Press Club.
