SHILLONG, Nailar 08: Ka Meghalaya kan pynkhreh ban pynlong ïa ka lympung lehkai Wishu kaba saw sngi lynter ïa kaba la tip da ka ‘ASMITA Wushu League East Zone’ ban sdang naduh mynta ka sngi, 09 tarik haduh 12 tarik mynta u Nailar, 2024.
Kane ka rynsan ïakop ka ban pynlong ha Indoor Stadium NEIGRIHMS, la khmihlynti ba kin don haduh 550 ngut ki nongïashimbynta ki ban ïakhun ban ïoh khur takma ha ki kyrdan bapher bapher, naduh ka Sub-Junior, Junior bad kyrdan Senior.
Ka song tyngka ba la pynkhreh na bynta ki nongjop ka long haduh 7.2 Lak, kum shi bynta ban ai mynsiem bad pynshlur ïa ki samla kiba kynsai bad kiba tbit ha kane ka jingïalehkai. Phra ngut ki nongïalehkai kiba wan kyrdan ba hakhmat ki lah ban ïohpdiang khusnam song pisa ha kane ka lympung.
Ha ryngkat ka jingthmu ban pynkha roi ïa ka sap jong ki khynnah samla, ka ASMITA Wushu League ka buh ruh ïa ka thong ban pynpaw nam ïa kane ka jingïalehkai sha kane ka thaiñ.
Mynta ka samoi, kane ka league ka ladep sdang ha South bad ruh ïa ka North Zone. Ka West Zone kan sdang ynda la kut ka lympung ha East Zone.
Ka Shillong, kaba la bna nam ïa ka jingitynnad ka mariang bad ka kolshor, kan long ka jaka kaba biang ban pynlong ïa kane ka jingïalehkai kaba itynnad. La khmihlynti ruh ba kane ka lympung kan khring ruh ïa ki nongpeitkai ban wan sakhi da la ki jong ki khmat ïa ka jingtbit jong ki khynnah lehkai ha kane ka jait Sports.
Lah ban kdew, ryngkat ka jingkyrshan na ka ASMITA Wushu League, ka lawei jong ka jingïalehkai Wushu ha kane ka thaiñ ka long kaba phyrnai.
