SHILLONG, Naiwieng 08: Mynta ka 09 tarik Naiwieng, 2024 (sngi Saitjaiñ) Ka Khasi Student Union (KSU) Laitumkhrah kan pynlong biang ïa ka rynsan ïakhun jan miet lane kata ka ‘fight night’ kaba la jer kyrteng da ka “Maitshaphrang Fight Night Season-II” ha kaba ki khun samla shynrang bad kynthei kin ïoh ban pyni ïa ka sap ka phong ha kaba ïa dei bad ka jingïakhun MMA.
Haba kren ha ki lad pathai khubor na ka liang jong u Bah Sambormi Lyngdoh President ka KSU Laitumkhrah Unit u la pynpaw ba kane ka rynsan kaba kongsan ban plie lad ïa ki samla bad ba ki paidbah kin ïoh ban sakhi da la ki jong ki khmat ïa ka sap kaba ki khun samla shynrang bad kynthei ki don ban pynpaw lyngba kane ka lympung, ba ka KSU kala pynkhreh hala ka bor ban pynlong ïa kane ka rynsan kaba jop.
Shibynta ka jingpynlong ïa kane ka rynsan ïakhun ka long ban pynremjur ïa ki jingdih ba sniew kum u drok kiba ktah ïa ka long rynïeng jong ki khun samla ka thaiñ.
“Kum kane ki rynsan ka ïarap ban kyntiew bad pynshlur ïa ki samla ba kin ïoh jingkoit jingkhiah bad ngi kyntu ïa ki samla ba kin wan shakhmat ban pyni ïa la ki sap khnang ba kin lait na ki jingsniew bapher bapher ,” ong u bah Sambormi.
La khmihlynti ba ha kane ka rynsan ïakhun kin don shibun ki ban wan ïashim bynta na ki jaka kilanmet (MMA Gym) bapher bapher, nalor kata, kin don ruh katto katne ki rang bad ki thei ïakhun MMA ba pawnam ki ban sa wan sakhi ïa kane ka lympung mynta ka sngi.
ïa kane ka lympung yn pynlong ha madan lehkai Basketball jong ka skul St. Anthony’s, Shillong ha ka por 3 baje nohphai sngi.
Ha kane ka lympung lehkai kin don kumba 30 ngut ki rang bad thei ïakura na ki MMA Gym bapher bapher ka jyla. Ki nongjop ha kane ka lympung kin ïohpdiang ïa ka khusnam song pisa, ki takma ryngkat ki syrnod.
