Mynta yn ïakren u Myntri Rangbah duh Narendra Modi bad ki samla pule na kylleng ka ri India

New Delhi Rymphang 09: Ka Pariksha Pe Charcha 2025 (PPC 2025) ka la khreh ban long ha ka 10 tarik Rymphang, 2025 ha ka por 11 baje mynstep. U Myntri Rangbah duh Narendra Modi un ïakren bad ki khynnah pule, ki kmie ki kpa bad ki nonghikai, ban ai jingmut halor ka jingpynkhreh ïa ka eksam, ban ïada na ka jingkhuslai, bad ka jingkiew shaphrang.
Mynta u snem, 36 ngut ki khynnah pule na baroh ki Jylla bad UT, ki la shah jied na ki State/ UT Board jong ki skul sorkar, KendriyaVidyalaya, Sainik School, Eklavya Model Residential School, CBSE bad Navodaya Vidyalaya. Katto katne ki samla pule ki dei ki khynnah pule jong ka PRERANA school programme, ki lah duh jong ka Kala Utsav bad ka Veer Gatha. Kine ki samla pule ki la shah jied ban ïakren bad u Myntri Rangbah duh – kaba pynlong ïa kane ka bynta ka jingpyni ïa ka jingïar jong ka India bad ka jingkynthup ïa baroh.
Da ka jingbynrap ïa ka bynta ba thymmai, yn pyni ïa ka PPV 2025 ha ka rukom kaba thymmai kaba kynthup phra tylli ki bynta. Ïa ka jingïakren ba nyngkong bad u Myntri Rangbah duh yn pyni ha ka Doordarshan, Swayam, Swayam Prabha, PMO YouTube channel bad ki channel social media jong ka Tnad Pule Puthi bad Tnad I&B jong ka sorkar pdeng kaba pynthikna ba ki briew na kylleng ka ri ki lah ban ïashim bynta ha kane ka kam kaba ai jingïarap bha.
Lyngba ka jingkylla ka PPC sha ka Jan Andolan, ka koit ka khiah ha ka bor pyrkhat bad ka met ka phad jong ki khun jong ngi la lah ban pynbeit lyngba ka jingïatreilang ha ka imlang sahlang. Kumta, ka bynta ba 8 kata, ka PPC 2025 kan don ki riewshemphang ba pawkhmat na ki bynta bapher bapher ki ban ïasam ïa ki jingshem jong ki bad ka jingtip, ïalam lynti ïa ki khynnah pule halor ki bynta ba kongsan jong ka jingim bad ka jingpule, ha 7 tylli ki bynta jong ka PPC. Ki khynnah pule kiba ïashim bynta ha kine ki session kidei kiba la shah jied lyngba ka rukom jied na ki Jylla/ UT, ki kynhun ai jinghikai bad ki jingïakob ha ki skul kylleng ka ri. Kine ki bynta, kiba peit bniah ïa ki kam bapher bapher ki kynthup.
Ha ka Kam ïalehkai & ka jingskhem jingmut: Ka M C Mary Kom, Avani Lekhara, bad Suhas Yathiraj kin ïakren shaphang ka jingbuh thong, ka jingskhem jingmut bad ka jingïada na ka jingkhuslai lyngba ka jingskhem jingmut.
Ka koit ka khiah ha ka bor pyrkhat: Ka Deepika Padukone kan ïakren shaphang ka jingkongsan ka bha ka miat kaba ïadei bad ki jingmut jingpyrkhat bad ka jinglah ban kren shaphang ki jingsngew lajong.
Ka bam kaba tei: Ka Shonali Sabherwal bad Rujuta Diwekar kin kren shaphang ki rukom bam ba tei met bad ka bynta jong ka jingïohthiah bha ban jop ha ka jingpule. U Revant Himatsingka, ba la tip kum Food Farmer, un ai ki jingsngewthuh ban im ka rukom im kaba koit ba khiah.
Teknoloji & kam pisa: U Gaurav Chaudhary (Technical Guruji) bad ka Radhika Gupta kin kren shaphang ka teknoloji kum ka atiar na ka bynta ka rukom pule kaba kham ai jingnang jingstad bad ka jingsngewthuh ïa ki kam pisa.
Ka jingsaiñdur & ka jingbha ki jingmut jingpyrkhat: U Vikrant Massey bad ka Bhumi Pednekar kin ai mynsiem ïa ki khynnah pule ban pyllait ïa ki jingmut jingpyrkhat ba sniew, kyntiew ïa ka rukom pyrkhat kaba bha.
Ka jingpynleit jingmut & ka jingtngen: U Sadhguru un ïasam ïa ki rukom kyntiew ïa ka jingpynleit jingmut ban ïarap ïa ki khynnah pule ban don ka rukom pyrkhat kaba shai bad kaba lah ban pynleit jingmut.
Ki khana jong ka jingjop: Kiba wan shakhmat ha ki eksam bapher bapher kum UPSC, IIT-JEE, CLAT, CBSE, NDA, ICSE bad kiwei kiwei lem bad ki nongïashim bynta ha ka bynta ba la dep jong ka PPC kin ïasam kumno ka Pariksha Pe Charcha ka la ai bor ha ki rukom pynkhreh jong ki bad ai mynsiem ïa ki.
Naduh ba la sdang ïa ka ha u 2018, ka Pariksha Pe Charcha ka la kylla sha ka jingïakhih ha kylleng ka ri bad ka bynta kaba mynta u snem ka la pynkheiñ ïa ki rekod barim lyngba ka jingïashim bynta palat 5 klur, kaba long ka bynta kaba ai jingïarap tam haduh mynta.
Ka Tnad Pule Puthi ka la shim ïa ki sienjam ba kyrpang ban pynthikna ba ki khynnah pule, ki kmie ki kpa bad ki nonghikai baroh ki lah ban ïashim bynta ha kane ka rynsan, kaba la pynlong ïa ka Pariksha Pe Charcha ka sienjam kaba wanrah jingkylla kaba kyntiew ïa ki khynnah samla, ïalam lynti ïa ki sha ka jingjop ha ka jingpule bad ka jingkiew shaphrang.
Na ka bynta ka jingïoh jingtip, ki jingtip shaphang ka jingïashim bynta, bad ki jingai jingmut, ïasoh bad ki rynsan social media jong ka Tnad Pule Puthi bad Tnad I & B.