Shillong, Kyllalyngkot 09 : Ka Meghalaya mynta kan hap ban ïalehkai bha ha ka plate group jong ka Ranji Trophy ha kaba kan sa ïakhun khatduh lashai ka sngi ba ar ha madan ïalehkai kriket jong ka MCA ha Polo.
Ka jingïalehkai kan sdang ha ka por 8:30 baje mynstep, bad la pynkhreh ruh ïa ki jaka shong na bynta ki nongpeitkai khlem da donkam siew bai rung.
Ka Meghalaya mynta ka samoi ka la lah ban ïalehkai bha, da kaba jop ïa baroh saw sien ki jingïalehkai kynthup arsien ha ka jingïalehkai ha la ïing bad arsien shabar na la ïing bad mynta kan hap ban ïakhun pyrshah ïa ka Manipur kaba don ha ka kyrdan kaba ar.
Ka Meghalaya kaba kamai 25 poiñ bad ka Manipur 14 poiñ, ka (Meghalaya) ka la bat lypa ïa ka kyrdan kaba nyngkong na ka plate group.
Na ka liang ka Selectioin Committee jong ka MCA ka la dep ban pynbna lypa ïa ka kyrteng ki 15 ngut ki rangïalehkai bad kiban mih madan nyngkong ha ka thup ki 11 ngut. Kine ki kynthup u Kishan Lyngdoh, Bamanbha Shangpliang, Sanvert Kurkalang, Dippu Ch Sangma, Lerry G Sangma, Tarique A Siddique, Manish K Rai, Abhishek Kumar, Akash K Choudhary, Arbin Singh, Md Nafees Siddique, Lakhan Singh Nahar, Swarajeet Das, Punit Singh Bisht bad u Rajesh Bishnoi.
