Shillong, Kyllalyngkot 09 : Ka Mawpait Tlongpleng Sports & Cultural Club (MTS&CC) kum shi bynta ban pdiang ia u snem thymmai, bad kumba ju long man ka u snem, myntah u snem ruh, ka la pynlong ia ka jingialehkai sngewtynnad hapoh ka shnong ïa kaba la tip kum ka Mawpait Tlongpleng Meet 2023.
Ha une u snem ki la don haduh 18 tylli ki jait jingïalehkai, ba kynthup ka Run For Run, Carrom Board, Drawing and Scetching, Fancy Dress, Hit the tin, Mawpoiñ, ka Penalty Shoot Out, Marble Race, Sack Race, Horse Fighting, Quiz, Singïing, Skit, Arm Wrestling, Dringking Water, Tug of War, Chilli Eating bad ka Dancing.
La sdang ïa kane ka prokram ha ka 2 tarik Kyllalyngkot 2023 da ka Carrom Board bad la pynkut ha ka 7 tarik Kyllalyngkot 2023 da ka Dancing.
La pynlong ïa kine ki jingïalehkai ha ki saw tylli ki House, ba kynthup ka Tirot Sing House, Kiang Nangbah House, Sngap Sing House bad ka Wickliffe House.
Ka kynhun kaba kaba ïoh rah ïa ka nam lahduh mynta u snem kadei ka Wickliffe House kaba la kamai 820 point, kaba wan ba ar kadei ka Sngap Sing House kaba kamai 630 point, kaba wan ba lai kadei ka Tirot Sing House 500 point bad kaba khatduh kadei ka Kiang Nangbah House kaba kamai 470 point.
La pynïaid ïa kane ka prokram pynhap pyrda da u President ka MTS&CC Bah Kromlin Shylla. La ïoh jingkren na u Bah khrawbor Shylla u dkhot ka Executive Durbar bad kum juh ruh na u Myntri Bah Donboklang Kharlyngdoh.
Haba ai jingkren u Bah Khrawbor Shylla u la pyrto ïa ka Sports Club ba ka la lah ban pynlong ïa kum kine ki prokram manla u snem bad u la ong, “Nga itynnad ban ïohi ba ki hep kiba rit ki la kmen bha ha kane ka taïew da ka jingïashim bynta shitrhem ha ki jingïalehkai bapher bapher”.
U Bah Donboklang haba ai jingkren u la ong, “Ka jingsngew nguh bad ka burom kaba nyngkongeh ka leit sha u Kynrad nongbuh nongthaw uba la long ryngkat bad ka MTS&CC kumjuh ruh bad ki hep kiba rit, namar ngam ïohsngew ban don uwei ruh uban shitom ne mynsaw ha kine ki taïew lehkmen. U la ong ruh ba kane ka jingpynïalehkai jong ka MTS&CC ka dei ruh kum ka jingpynpyngad jabieng ïa ki khynnah kiba dang shu dep ïa ki eksam bapher bapher ha u snem ba ladep”.
U la ai khublei ïa ka Wickliffe House kaba la ïohrah ïa ka nam lahduh mynta u snem bad Sngap Sing House kaba wan ba ar. U la ai mynsiem ïa ki House ki bym shym la jop ba kidei ban don ka mynsiem ïakhun nangne shakhmat khnang ba ma ki ruh kin sa ïoh rah ïa ka trophy jingjop lang ha kawei ka sngi.
Ha kaba ïadei bad ka jingpynkup burom u la ong, ba ka jingpynlong ka Dorbar Shnong ïa kum kane ka jingpynkup burom ka long ban ai mynsiem ïa ki khynnah ba kin nym sangeh shiteng por ha ki jingpule ki jong ki bad kumjuh ruh ban kyntiew ïa ka pule puthi hapoh ka shnong.
Nalor jong katei ka Award ka Dorbar Shnong Mawpait Tlongpleng ka la ïoh ban ai jingai sngewbha snem thymmai, da ki tapmoh khlieh sha ki 6 ngut ki longkmie kiba nabar shnong, kiba ju wan shong dukan hapoh ka shnong Mawpait Tlongpleng.
Kane ka long katkum u kyrwoh khubor na u Bah Toborlin Syiemlieh uba dei u Assistant General Secretary ka MTS& CC.
