Mynta u ‘Nailur lane taïew ba nyngkong u Risaw yn sdang ka NSC ïa ka GJIFT 2024
Mawkyrwat, ‘Nailur 03 : Ka Nonglang Sport Club (NSC) kum shibynta ka jingrakhe ïa ka Jubili Ksiar ne ïa ka jingdap 50 snem jong ka Sport Club shen kan sa pynlong ïa ka lympung ïalehkai kynjatbol kaba ki la ai kyrteng ka “Golden Jubilee Invitation Football Tournament 2024” (GJIFT 2024) ha madan Nonglang Pynden-ïewlyngdoh, South West Khasi Hills District
Haba kren ha ki lad pathai khubor, u Secretary Nonglang Sport Club, bah Kordorlin Lyngdoh u la ïathuh ba ka jingpynlong ïa ka GJIFT 2024 ka long kum shibynta jong ka jingkynjoh jong ka Nonglang Sports Club ïa u mawmer ba 50 snem.
Namarkata, u la ïathuh ba ha kane ka lympung na ka liang ka sports club ka la dep ban pynkhreh ruh ïa ka khusnam kaba long T. 2 lak tyngka kata ka nongjop kan ïoh ïa ka song pisa kaba T. 1.30 lak ryngkat ka khusnam bad ïa kaba wan ba ar ka long T. 70 hajar ryngkat ka khusnam.
“Kane ka lympung ïalehkai ka “Golden Jubilee Invitation Football Tournament 2024” kan sa sdang ha u taïew ba khatduh jong u bnai ‘Nailur lane ha ka taïew nyngkong jong u bnai Risaw”, ïathuh u bah Kordor.
Kumta, halor kane ka jingpynkhreh na ka liang ka sports club ka khot ka wer ïa ki sports club, ki kynhun shimet bad kino kino kiba kwah ban wan ïashimbynta ha kane ka lympung kiba na kylleng jong ka Ri Khasi bad Jaiñtia ba kin sngewbha ban wan, khnang ba jingthmu jong ka sports club ban rakhe ïa ka sngi ba kyrpang kan long kaba jop ha ki liang baroh. “Kumta ka jingpynkhreh bad jingpynbha ne pynheh ïa ka madan mynta ka la ïaid shaid shaid”, ong u bah Kordorlin.
Ym tang kata, ha kane ka jingrakhe ïa kane ka sngi kyrpang jong ka Nonglang Sports Club na ka liang u bah Kordorlin Lyngdoh u la ong ba ka sport club ka la sdang ïa kane ka jingrakhe Jubili Ksiar naduh u snem 2023 bad ka ban sa ïoh ban pynkut ha u snem 2025.
“Ha kine ki jingpynkhreh baroh, kum ka sports club ka la ïoh ban pynlong ïa shibun bah ki jait jingïalehkai kata naduh ka jingïalehkai kynjatbol, basketball, badminton, volleyball, jingïasiat khnam, kriket, jingïakop ïa-khun-kti bad kiwei de ha kaba ha kine ki jait jingïalehkai la wan ïashimbynta shitrhem naduh ki heprit, samla shynrang kynthei bad ki rangbah kumjuh.
Namarkata, ban pynïaid shaphrang ïa kane ka jingrakhe, ka Sport Club ka la thaw ïa ki tnat komiti bapher bapher ba kin pynïaid shakhmat ïa ki kam da kaba ki pynlong ïa ki jait jinglehkai bapher bapher hapoh ka shnong ha kaba dei ha ka 29 tarik u ‘Nailar, 2024 ka la ïoh ban plie pyrda biang ïa ka Inter Dong Football Tournament.
Kumta na ka liang ka Nonglang SC ka khot ka wer ïa ki kynhun bad ki sport club bapher bapher jong ka Ri Khasi bad Jaintia ba kin wan ban ïashim bynta bad lehkmen lang bad ka sport Club ha katei ka lympung ka ban sa sdang ha u taiew ba khatduh jong u bnai ‘Nailur lane taïew ba nyngkong jong u bnai Risaw.