Mynta u bnai yn soi pynthymmai ka Sorkar Meghalaya ïa ka soskular National Games 2027

Shillong, Jymmang 19 : U Myntri ka tnad Sports and Youth Affairs ka sorkar Jylla Bah Wailad Shylla hynne ka sngi Ba-ar u la pyntip ba ka ka jylla ha ka 30tarik mynta u bnai kan soi pynthymmai biang ïa ka soskular jong ka 2027 National Games ha kaba u Myntri ka tnad Sports ka Sorkar Pdeng un wan sha Shillong na ka bynta ka jingïalang ba arsngi jong ka Eastern Zone.
Ha ka jingïakren bad ki lad pathai khubor u Myntri u la ong, “Ïa kane nga la ïoh jingtip da ka ktien mynin ka sngi watla haduh mynta ngam pat ïoh ïa ka jingtip da ka jingthoh. Hynrei watla katta katkum ka kyrwoh la sngewthuh ba u Myntri ka tnad Sports ka Sorkar Pdeng ryngkat u Myntri Khynnah nalor kiwei ki heh sorkar jong ka tnad kin sa don ha Shillong naduh ka 28tarik mynta u bnai.”
La ïathuh ba kane ka jingwan jong ki sha Shillong ka dei na ka bynta ka jingïalang jong ka Bharat Group Team kaba dei jong ka Eastern Zone. “Ha ka 28 bad 29 tarik kan don ka meeting jong ka Bharat Group Team kaba ju don ha baroh ki jylla. Kane ka jingïalang ka dei na ka bynta ka Eastern Zone kaba kynthup ïa ki jylla jong ka thain shatei lam-mihngi jong ka Ri, ka West Bengal bad ruh ka Odisha,” u la bynrap biang.
Katkum ka jingïathuh jong u Myntri mynta ka kynhun na Meghalaya ka don ha nongbah New Delhi ha ka taiew ba la dep ban ïakren na ka bynta ka soskular National Games kaba la dep ban soi nyngkong naduh phra snem mynshwa. “Ha ka taiew ba la dep ka kynhun jongngi na Shillong kala leit sha Delhi ban kynduh ïa ka Sports Ministry haba ïadei bad ka jingpynthymmai ïa ka soskular ban pynlong ïa ka National Games ha u 2027,” u la ong.
“Ki don katto katne ki bynta ba donkam ban pynbeit namar ka la long kaba la slem bha. Dei na kata ka daw ba ngi kwah ban pynthymmai ïa kane ka jingsoskular.”
U Myntri u la ïathuh ruh ba dei u Myntri ka Sorkar Pdeng uba tyrwa ban soi ïa ka soskular ba la pynthymmai ha Shillong. “Haba ngi la ïakren bad ki, u Myntri hi u la ong ba ka bha ba ngin leh hangne ??ha nongbah Shillong. Kumta, kane kan sa long ha ka 30 tarik Jymmang ”, u la ong.
U la pynthikna ba ka soskular ka la don lypa hynrei ka donkam ïa ki jingpynkylla kumba la ai jingmut da ka Indian Olympic Association. “Ngi la dep ban ïa soi ïa ka soskular hynrei ki don katto katne ki jingpynbeit kiba dang leh na ka liang ka Indian Olympic Association (IOA)”, u la ong.
Shuh shuh u la ïathuh ba ïa mynta hi u dang ap ïa ki jingtip ba bniah na ka kynhun kaba la leit sha Delhi.
Haba ai jingtip halor ki jingpynkhreh, u Myntri u la ong ba ka kam ka la ïaid stet bha. “Ka jingpynkhreh ka ïaid bha kumba long mynta. Ngam ong ïa kane tang kum u Myntri ka tnad Ïalehkai hynrei nga ong ïa kane hadien ba la bun ki jingleit jngoh na ka tnad ïalehkai bad ka sien kaba la dep na ka IOA. Bun ki briew kiba la wan bad jngoh bad leh ïa ka jingjurip ha katei ka jaka ruh ki la sngewhun bha ïa ka jingpynkhreh jong ngi mynta hi,” u la ong.