Buh nongrim u Myntri Rangbah ka Jylla ban tei ïa ka mini stadium ba 3.44 klur ha Damas, ha North Garo Hills

Damas, Jymmang 19 : U Myntri Rangbah ka Jylla Conrad K Sangma ha ka sngi Nyngkong u la buh ïa u mawnongrim na ka bynta ka mini stadium ha Damas, kaba pyni ïa ka sienjam ba kongsan ha kaban pynbun ïa ki jingtei jaka ïalehkai bad plie kham bun ki lad ïa ki samla hapoh ka Disrict.
Kane ka prokram, ba la pynlong da ka tnad Sports & Youth Affiars, ka la long ha Sacred Heart Secondary School, Damas, North Garo Hills District.
Kiba ïadonlang ha ka prokram ki long u Timothy D Shira, Myntri ka tnad Tourism, Fisheries bad Agriculture, u Marthon D Sangma, Chairman, Meghalaya Tourism Development Corporation bad MLA ka 38-Mendipathar Constituency (ST), u Rupert M Momin, MLA ka 37-Kharkutta Constituency (ST), ki Ophisar na ka Tnad Sports & Youth Affairs, Agriculture, ki bor District, ki nongïalam ka thain, ki samla pule bad ki riew paidbah.
Haba ai jingkren ha ka jingïalang, u Myntri Rangbah u la ong ba ka jingdawa kaba la sahteng la slem jong ki samla ka Damas ban ïoh ïa ka madan ïalehkai, mynta ka la urlong da ka jingbei tyngka ba T.3.44 klur hapoh ka Tnad Sports & Youth Affairs ban shna ïa ka mini stadium. U la ong ‘Da ka jingbuh ïa u mawnongrim, ka Sorkar ka la ku lar paidbah ïa ka song T.3.44 klur ban tei ïa ka mini stadium ba thymmai ha Damas. Kane ka dei ka jingku lar kaba sngewrit bala pynurlong sha ka shnong jong ngi”.
U la ong ba kane ka project kan pynkylla ïa ka madan ba don mynta sha ka madan ïalehkai kaba janai bad kaba don ïa ki cover gallery, open gallery, bad ki jingdonkam bala pynbha kiba dei ban don ha madan, bad bynrap ba “Kane ka mini stadium kaba la ap la slem bha kan shakri kum ka jaka ba lah ban pyndonkam ïa bun kiei kiei na ka bynta ki samla jong ngi, ki skul bad ki jingïalang jong ka Shnong”.
U Myntri Rangbah u la bynrap ba ka stadium kan pynlah ïa ki nongïalehkai ka thain ba kin ïoh ïa ka rynsan ïakop kaba kham bun, haba pynpaw ba kan sa “pynlah ïa ki nongïalehkai jong ngi ba kin leit ïashimbynta sha ki lympung ba shabar kum ha ki District, Inter-District bad Inter-State”.
U la pynpaw ruh ba ka Sorkar ka dang trei ïa ki kam ban pynurlong ïa ka thong ha kaban pyntrei ïa 510 tylli ki jingtei jaka ïalehkai hapoh u 2028, da ka jingthmu ban pynmih ïa ki nongïalehkai kiba lah ban mihkhmat ïa ka Ri ha ka 2032 Olympics, haba pynbna ba “yn ym don ki district, ki block, ne ki shnong ki ban shah ieh shadien”.
Haba kdew ïa ki jingkynshew ha ri-lum Haro, u la ong ba palat T.400 klur lah ai ka jingku lar na ka bynta ki 53 tylli ki project, katba ha North Garo Hills, khyndai tylli ki project ba shongdor T.33.81 klur la pyntrei naduh us nem 2018 ba kynthup ïa ki stadium, ki basketball court bad ki jaka ïalehkai indoor”.
Haba kdew halor ka sap ïalehkai ki trai shnong, u la pynpaw ïa ka kyrteng u Henry A Sangma, u nongïalehkai na Babukhona, North Garo Hills, uba la jop ïa ka takma rynnong ha ka North East Olympic Games, bad Cherim Ch Sangma na Bajengdoba, North Garo Hills, uba la sdang ïa ki jinghikai ha u 2023 bad nangkiew lyngba ka STAR programme sha ka Advanced Athletics Programme.
Kiwei pat kiba la ai jingkren ki kynthup ïa u Timothy D Shira, Myntri ka Tnad Tourism, Fisheries bad Agriculture ka Sorkar Meghalaya, u Dpeuty Commissioner ka North Garo Hills Abhishek Saini bad kiwei kiwei.
Ha kajuh ka por, kum shibynta jong kane ka prokram, la pynher lama ruh ïa ki kali Mission Organic Value Chain Development for North Eastern Region (MOVCDNER) jong u snem 2024-25 bad 2025-26. Kine ki kali ki kynthup ïa ki power tiller bala thied haph ka State Plan Scheme (Farm Mechanization) 2025-26.