Mynta kut ka jingai por ka sorkar ïa ki Harijan lada ym jubab la poi sha High Court

Shillong, Nailar 25 : Ka jingai por ba khatduh bad ba 15 sngi jongka sorkar ïa ka Harijan Panchayat Committee (HPC) ba kin ai ïa ka jubab la ki pdiang ne em ïaka jingtyrwa ka sorkar ban pynkynriah ïa ki na Them Iew Mawlong kat kum ka Blueprint ba la aiti sha ki, sha kawei pat ka jaka ba shajan Saw Phurlong ka ophis ba rim jongka Shillong Municipal Board kan kut lashai ka 26.8.2024 bad lada jia ba kim pdiang ne jubab kat haduh lashai ka sngi ka sorkar kan aiti noh ïa kane ka kam sha ka ïing bishar High Court ban shim ïa ka rai kaba khatduh.
U Symbud Myntri Rangbah ka jylla u ma Sniawbhalang Dhar u la ong “ Lada ka HPC ka kyntait ïa ka Blueprint jongka sorkar kam don shuh da kawei ka lad ka lynti hynrei ban ïeh beit ha ka ïing bishar High Court ba kan leh ïa kaba donkam”.
“ Tang kawei ka HPC ka dei ban tip bad sngewthuh ba lada kane ka kam ka poi biang ban ïa pynbeit hakhmat ka ïing bishar ym don jingmap shuh bad kiei kiei ki jingkular ka sorkar ban ïarap ïa ki kat kum ka Blueprint kin duh noh bad kumta ka shong ha ka HPC ban shim rai bad pyntip noh mar mar sha ka sorkar khlem kano kano shuh ka jingpynslem” ong biang u ma Sniawbhalang.
Ha ka 10 tarik mynta ubnai ha ka jingïakynduh ka sorkar bad ka HPC la ai por ïa ki 15 sngi ban ai jubab halor ka rai jong ki na ka bynta ban pynkynriah ïa ki 342 tylli ki long ïing na Them ïew Mawlong. “ Ngi la mynjur ban ai por ïa ki 15 sngi ban ïa pyrkhat bad shim rai bad pyntip sha ka sorkar kumta kan ym don shuh kano kano ka jingïakren halor kane ka kam” ong u Symbud Myntri Rangbah.
Lah ban pynkynmaw ba ka sorkar ka la pynkhreh ïa ka blueprint hadien ba ka sorkar ka la kyntait ïa ki jingtyrwa ka HPC kaba la ai sha ka sorkar ha ka 25 tarik Iaiong 2022. Ka jingdawa jongki ka long ban ai mar 200 square meter ka jaka sha man la ki 342 tylli ki long ïing hapoh u pud u sam ka European Ward bad nalor kata ban pyntei ïa ki ïing ki sem na ka bynta jongki ruh.
Ha ka 31 tarik Nailar 2022 ka sorkar la pynbna ban shna da ki ïing bun mala ha ka jaka ba heh 2.5 acre. Ka tyllong khubor ka ïathuh ba ka jingpyneh ka HPC ka dei haalor ka jingdawa ban ym pynpra ne pynkynriah ïa ka Gurudwara bad ïing Mane kiba don ha Them ïew Mawlong katba ka sorkar kam mynjur namar ha ka blueprint la dep pynkhreh ban shna ïa ka Gurudwara bad ïingmane ha ka jaka sah jongki bad ïa kitei hap ban pynpra namar ka sorkar ka donkam ïa ka jaka ban shna ïa ka Super Market bad Parking Lot.