Shillong,Nailar 26: Hadien ba ka kynhun ïashimbynta ka ri India ka la wanphai da tang 6 tylli ki takma (kawei ka takma rupa bad 5 tylli ki nong) na ka Olympic Games ha Paris, kaba la pyndiaw mynsiem ïa u ba bun paid u ba la khmihlynti ba ka ri kan ïalehkai bha ha kane ka Olympic 2024.
Haba khmih bad nujor mynshwa ha ka Tokyo Olympic, ka India ka la khur haduh 7 tylli ki takma,nalor kata, ka kynhun ka ïoh ruh ban khur kawei ka takma ksiar ha ka ïakop kawang sum lyngba u Neeraj Chopra.
Watla kata ruh, ka India ka la pyrshang tyngeh bad ki la don katto katne ki nongïalehkai, kiba la shu duh salit ban kynjoh sha ka wat ïakhuun knieh takma, bad don ruh kiba la pynkhihwin wat ban jop ruh ïa ka takma ksiar, ka jingapkhmihlynti ka la long kaba jur bha na ka Vinesh Phogat hynrei shah pynduh noh naba tam kilo jingkhia shuwa ka final, bad u Neeraj u ba la wan ba ar ha ka Javelin mynta u snem.
Ha ka sngi saitjaiñ na ka liang jong ki nongthohkhubor ki la ïoh ban ïakren bad uwei na ki Coach kynhun ïakura ka India u ba long Coach artad ha ka shlem treikam jong ka Sports Authority of India ha Arunachal Pradesh, u Torak Kharpran.
Haba kylli ïa ka jingbymlah ban khur takma ki thei bad rang ïakura ka India ha ka Paris Olympic, u la batai ba 6 ngut ki nongïakura ka kynhun India kiba la ïoh ïashimbynta ha kane ka Olympic ha Paris ki dei ki bym shym la shah thup kyrdan lane ki unseeded boxer ha kaba maki ki la hap ban aireng pyrshah ïa ki nongkura kiba la kham kynsai bad kiba la kham satar.
Na ka liang ki shynrang, u Torak u la pynpaw ba wat lada ki don tang arngut ki rangïakura kiba la ïoh ban mihkhmat, hynrei ka ri ka la sei madan ïa ki nongialehkai kiba kham kynsai hynrei sngewsih ba kim shym la lah ban poi sha ka thong ban ïoh khur takma.
U la ong ba haba phai sha u Amit Phangal, u khlem shym la ïoh than ïa ka jingïakhun kaba jwat tangba ha ka por ba u ïakhun, ka score kam shim la lah ba kan iaid bha sha u katba u Nishant Dev uba la lah ban kynjoh shaduh ka quaterfinal, bad haka jingïakhun pyrshah ïa u rangïakura na Mexico, u la ïathuh ba na ka jingpeit ka jong u, u i kumba u Nishant u la dei ban jop ïa kane ka jingiakhun hynrei kaba eh ba kim lah ban pyndon lang ïa ki kor techonology ha ka liang ka score, bad ka jingbakla ha ka jingbynta point na ki nongbishar kan ïai don.
Haba phai lei lei sha ka Nikhat Zareen, kaba baroh baroh ki la khmihlynti ban khur takma, u Torak u iathuh ba ha ka wat ba ka ïakhun pyrshah ïa ka thei ïalehkai ka ri China, kam shym la lah ban ïalehkai kumba baroh ki la ap khmih lynti ha kaba ka la mad noh ïa ka jingshah rem da 4-1 katkum ka rai.
Lah ban kdew ba ha kane ka Paris Olympic ki la don haduh 9 ngut ki nongïakura ka kynhun India kiba la jam sha ka wat ïakhun quaterfinal hynrei kaba sngewsih ba ym shym la don napdeng jong ki kiba la poi sha ka thong ban khur takma.
