Mynta ka sngi yn plie pyrda ka FKJGP Mawlai Circle ïa ka IXth Inter School Knock-Out Football Tournament

Shillong, Nailar 22: Ka FKJGP jong ka Mawlai Circle mynta ka sngi, ka 23 tarik, Nailar kan sa ïoh ban plie pyrda ïa ka IXth Inter School Knock-Out Football Tournament ha Madan Heh Mini Stadium, Mawlai Phudmuri ha ka por 3 baje janmiet.
La ïoh jingtip ba ba ki la don haduh 15 tylli ki Skul kiba la wan ban ïashimbynta ha kane ka Tournament ba la pynlong da kane ka sengbhalang.
Kumban shu pynkynmaw, na ka liang jong ka Seng, ka la ïoh ban pynlong ïa kane ka Tournament man la u snem kum shi bynta ban wanrah ïa jingkoit jingkhiah bad ruh ban pynshlur ïa ki khynnah pule ba kin shim bynta ha ki kam ïalehkai lane kilan met ban lait na kino kino ki kam lane ki jingdih kiba sniew.
Shuh shuh ka Seng mynta u snem ka la buh ruh ia ka phang pdeng kaba ong “Em ia u Drok, Hooid ïa ka Phutbol”. U Kongsan ha kane ka Sngi yn long u Bah Dundee Cliff Khongsit, President FKJGP Sengkmie bad U Symbud Kongsan yn long I Bah Arkinfield Khonglam Sports Secretary FKJGP Sengkmie.
Yn sa ïoh ban sdang ïa ka jingialehkai hapdeng ka O.M Roy Memorial School ka ban ïakhun pyrshah ïa ka Jaiaw Presbyterian School.
Ki kyrteng jong ki skul kiba ïashimbynta ha kane ka lympung ki kynthup ïa ka O.M Roy Memorial School, ka Jaiaw Presbyterian School, ki ar kynhun ban ïakhun mynta ka sngi, nangta ka Nongkwar Pres. School, ka MLP School, ka Garce Care Academy, ka Christ Church Day, ka Mawlai Pres. Sec. School, ka Christian Academy School, ka Mayqueen School, ka ST. Denis School, ka Stephan Memorial School, ka Umrynjah School bad khadduh ka Nongkwar Sec School kaba la ïoh ban kyntiew lypa sha ka quarter final.