Mawkyrwat, ‘Nailar 22: Ka Nonglang Sports Club ka long kawei na ki kynhun ba la rah ïa ka nam lahduh ha ka lympung ïalehkai kynjatbol ba la tip kum ka 2nd Independence Women Football Tournament 2023 ba la pynïaid da ka Kyntiew La I Sap Multipurpose Organizations (KLISMO) Mawlangwir ryngkat ka jingïatreilang bad ka ophis jong u DSO, South West Khasi Hills District hapoh madan Artificial Turf, MDSA Mawkyrwat, South West Khasi Hills District.
Haba phai ha ka lympung ïalehkai, hadpeng ka Nonglang SC pyrshah ïa ka Maitshaphrang Girl Football Club ka la long shisha kaba itynnad namar da ka jingtbit ki ‘thei ïalehkai na baroh ar liang, hynrei katba ki minit ki la nang ïaid ka Nonglang SC ka la ïalehkai bha da kaba ka la ioh ban thep ïa ka kol kaba nyngkong ha ka minit kaba 5 lyngba ka Nisilia Majaw kaba dei ha ka jingïalehkai jong ka kyllastep.
Haba wan phai biang sa ha ka jingïalehkai jong ka kyllamiet pat, na ka liang ka Maitshaphrang Girls FC ruh ka la pyrshang bun tylli ki lad ban ïoh ban thep kol hynrei da ka jingtbit ki’ thei ïalehkai jong ka Nonglang SC kim shem la ïoh ban thep wat tang shi kol ruh. Nangta, haba ka jingïalehkai ha kane ka kyllamiet ka la nangïaid ka Darisha jong ka Nonglang SC ka la ïoh ban thep ïa ka kol kaba ar ha ka minit kaba 87 bad lyngba kane ka kol ka pynlong ïa ka Nonglang SC ban rah ïa ka nam lahduh ha kane ka lympung ïalehkai kynjatbol.
Ha kane ka sngi la ïoh ruh ban sam ïa khusnam shimet kata, nongthep bun kol sha ka Nisilia Majaw, nongapkol bat bit sha ka Banrisha Wahlang kine ki dei jong ka Nonglang Sports Club bad ‘thei ïalehkai bat bit sha ka Banïarkynti Mylliemngap jong ka Maitshaphrang Girls Football Team.
U kongsan ha kane ka sngi u dei u bah Renikton Lyngdoh Tongkhar, MLA ka Mawkyrwat Constituency ha ryngkat da ka jingïadonlang ruh ki ophisar sorkar bad ki paidbah kiba la wan ban sakhie ïa kane ka lympung ïalehkai jong ki kynthei.
U bah Renikton L. Tongkhar kum u kongsan haba kren ha ka jingïalang u la ong ba kane ka dei ka sngi ban sah jingkynmaw da kaba kin long kita ki briew kiba kmen bad kiba don ka mynsiem laitluid da kaba sngewtrai ïa la ka jong ka Ri. Ula pynpaw ruh ka jingsngewnguh ïa ka Kyntiew La I sap Multipurpose Organizations bad baroh kiba ïa don bynta ha kane ka lympung ïalehkai na ka bynta jong ki kynthei bad kyrmen skhem ki dang lah ban pynlong shuh shuh kum ïa kine ki lympung khnang ba ki samla kynthei kin ïoh ban pyni ïa lade ïa ki sap bad ki phong ki jong ki namar ba ha ki juk mynta ka kam ïalehkai kam dei shuh tang ka jingïalehkai pynbyrngia hynrei ka dei kawei ka lad ban ïoh kamai pisa bad ruh ka lad ka lynti ha ka ban ïoh kam ïoh jam.
