mynta ka sngi yn ïakhun semi final hapdeng ki kynhun kiba bat kyrdan ba nyngkong

Shillong, Naitung 26: Ka lympung ïalehkai phutbol jong ki lahduh na ki 12 District kaba la tip kum ka State Level Subroto Mukherjee Cup Football Tournament 2023 kaba la pynïaid da ka Directorate of Sports & Youth Affairs, ka la jam mynta ha ka sngi ba lai bad ki kynhun ba bat ïa ka kyrdan ba nyngkong na ki Group jong ki, kin sa hap ban ïakhun biang ban ïohrung sha ka final.
Haba phai sha ki jingïalehkai kaba la long hynne ka Sngi Balang, kata baroh lai kyrdan kiba kynthup ïa ka Under-14 shynrang, Under 17 ki shynrang bad ruh Under 17 jong ki kynthei.
Ha ka kyrdan ïakhun jong ki Under-14 Boys, ka East Jaintia Hills K. B Memorial Sec School ka la ïakhaid mar 1 kol bad ka Eastern West Khasi Hills Little Star English Medium Sec School, ïa kine ki kol la thep da u Jerimi Dkhar bad u Kerbinson Marwein.
Ha ka jingïalehkai kaba bud, ka West Jaintia Hills H. K Sing Sec School ka la pynjem khnap ïa ka West Garo Hills St. John Sec School da kaba thep haduh 11-1 kol. ïa kine ki kol la thep da u Budmiha-oo Mukhim (8,16,37,47,65+ min), Markatjuh Shylla (13,40 min), Khamwadathrang Lhuid (14 min) Serene Dkhar (19 mins), Pdiang-i-Phawa (30+ min), Kynsai-i-Manmi War (52 min), katba ïa ka Garo Hills la thep da u Marck A Marak.
Ha ka jingïalehkai kaba lai jong ka Under-14 Boys, ka South Garo Hills Dabit Ampangdam S.S.A School ka la ïakhaid mar 1 kol bad ka West Khasi Hills St. Peter Hr Sec School bad ïa kine ki kol la thep da u Saint Zachariah D Shira bad u Bernard Mebankhlain Pyngrope.
Ha ka jingïalehkai kaba khadduh, ka Ri Bhoi Myngken Hr Sec School ka la pynbam haduh 16-1 kol ïa ka South West Khasi Hills Mawbidong Sec School, ïa kine ki kol la thep da u Chanjib Chettri u ba la khyrwit haduh 9 kol (10,12,17,21,28,34,50,52,54 min), nangta u Iainehskhem Marboh (27,39 min), Emeral Sohiang (30,44 min), Mebankhraw Nongrum (36,46 min), Shanbok Basaiawmoit (40 min), katba ïa ka shi kol na ka bynta ka South West Khasi Hills la thep da u Ferdyson Shangdiar.
Ha ka kyrdan ïalehkai Under-17 jong ki shynrang, ka East Jaintia Hills Rymbai Presbyterian Hr Sec School ka la jop salit da 2-1 kol ïa ka South Garo Hills Nilwagre Sec School. Kine ki kol la thep da u Taishah Bareh & Kenerous Dkhar.
Ka Ri Bhoi Mynken Christian Hr Sec School ka la pynliem da 5 kol ïa ka South West Khasi Hills Rangthong Christian Hr Sec School. ïa ki kol la thep da u Alicestar Thangklhiew, Vicky Kharthangmaw & Daniel Nongspung.
Ka West Garo Hills Dobasipara Sec School ka la shah rem ha ka East Khasi Hills Assam Rifles Public School da 2-1 kol bad ïa kine ki kol la thep da u Milli Putum, Emanbha Marbaniang, katba ïa ka shi kol na ka kynhun ba ïakhun pyrshah la thep da u Changkambath D. Sangma.
Ha ka jingïakhun kaba khadduh, ka West Khasi Hills Sibsing Govt Memorial Hr Sec School ka la jop da 2 kol ïa ka East Garo Hills Rongrengiri Govt Hr Sec bad ïa kine ki kol la thep da u Banteilang Kharmusalman, Wankerlang L. Lyngkhoi.
Haba phai pat sha ki kyrdan ïalehkai jong ki kynthei ba dang hapoh 17 snem, ka East Khasi Hills Iewrynghep Sec School ka bteng ban khur ïa ka namjop da 2-1 kol ïa ka South West Khasi Hills Rangthong Christian Hr Sec School, bad ïa kine ki kol la thep da ka Larihun Songthiang , Ibadarihun Nongsiej, katba na ka bynta ka Christian Hr. Sec School la thep da ka Juviality Lyngdoh.
Ka East Jaintia Hills Khliehriat Hr Sec School ka la ïakhaid da mar 3 kol bad ka Ri Bhoi Saiden Sec School, ïa kine ki kol la thep da ka Odakani Nongtdu shi kol bad ka Danishisha Lyngdoh 2 kol, katba ïa ka Ribhoi la thep da ka Daphishisha Syngkli, Phibanrica T Nongkseh , Daiamon Makhroh.
Ka West Jaintia Hills North Liberty Hr Sec School ka la jop kput haduh 7 kol ïa ka South West Garo Hills Birin Nuchong Sec School kine ki kol la thep daka Daphimon Khyriem, Eiladki Ksoo, Dakani Shylla , Deigracia Dan.
Ka East Garo Hills Chachat U.P. School Rongjeng ka la mad namrem ha ka West Khasi Hills Sibsingh Memorial Govt Hr Sec School da 3 kol. ïa kine ki lai kol la thep da i Ibadondor Nongsiej, Philasakhi Marngar, Younisha Thabah.
Ha ka kyrdan ïalehkai Under-14 (shynrang), kiba ïoh ban ïakhun ha ka semi final ki long ka East Garo Hills pyrshah ïa ka East Jaintia Hills, nangta ka Ribhoi pyrshah ïa ka West Jaintia Hills. Ha ka kyrdan Under-17 (Shynrang), ka West Khasi Hills pyrshah ïa ka East Khasi Hills, bad ka South West Garo Hills pyrshah ïa ka East Jaintia Hills. Katba ha ka kyrdan ïalehkai jong ki kynthei, ka West Khasi Hills pyrshah ïa ka Ri Bhoi, bad ka East Khasi Hills pyrshah ïa ka West Jaintia Hills.