Shillong, Risaw 24 : Ka lympung ïalehkai Fourth Division ba nyngkong eh jong ka Shillong Sports Association U-20 ka la poi mynta sha ka quarter final ha kaba ka jingïakhun ba nyngkong kan long ha kane ka sngi Balang ha madan First Ground Polo.
Ka jingïakhun ha kane ka sngi kan long hapdeng ka Kharang SC bad ka Pommura SC ha ka por 2:00 baje mynsngi.
Lah ban kdew hangne ba ka Kharang ka la ïoh ban bat ïa ka kyrdan kaba ha khliehduh jong ka miej ïa kheiñ point na ka Group B katba ka Pommura pat kadei ka kynhun kaba wan ba ar na ka Group D.
Lah ban kdew hangne ba ka jingïakhun ha ka Group -stage ha ka Fourth Division ka la kut noh ha ka 30tarik Nailur bad dei hadien katto katne ba la sakhi biang ïa ka jingïakhun ha katei ka Division.
Ka jingïakhun kaba bud pat kan long hapdeng ka Mawpdang pyrshah ïa ka Iatyllilang ha ka sngi Palei ha kajuh ka por bad ka jaka.
