Nongpoh, Lber 21: Ha kawei ka jingjia aksiden, kawei ka bos Night Super kaba don ïa u Registration Number AR 20 9099 kaba kit ruh haduh 37 ngut ki nongleit jingleit ryngkat ki jhur, kala kylla khongpong hynnin ka miet haka shnong Shangbangla kaba la wanrah ruh ka jingmynsaw jong bun ngut ki paidbah kiba shong ha katei k abos.
Katei ka jingjia kala jia hynnin ka miet haka por 10 baje eiei ha kaba katei ka bos ka dang mih na Guwahati ban leit sha Silchar, hynrei yn poi ha kawei ka jaka ba kham khongdong haka shnong Shangbangla katei ka bos kala leit ban jam beit na shilliang sha shilliang u surok 4-lane haduh ba kan da kylla khongpong.
La ïoh jingtip ruh ba katei jingjia aksident ka la jia dei namar ka jing phail brake jong ka bos bad la ïoh jingtip ruh ba bun ki naki paidbah ba shong hapoh katei ka bos ki la mynsaw ha katei ka jingjia bad la pynkit noh wut wut ïaki sha Civil Hospital Nongpoh bad ladon ruh ki katto katne ngut ki paidbah kiba la mynsaw jur naka liang ki Doktor ka Civil Hospital ki la phah noh sha Guwahati ban ioh ka jingsumar kaba kham paka.
Naka liang ka kong Besterlin Lawrynñiang kaba dei ka nongshnong shnong ka shnong Shangbangla bad kaba shong dukan harud surok ha katei ka jaka kala pynpaw ba bun naki jingjia aksiden ki ju jia ha katei ka jaka kaba wanrah ruh ki jingmynsaw bad shong syier ruh wat ïaki kiba shong ba sah ha katei ka jaka bad buh ruh ka jingkyrpad sha ka NHAI ban buh noh da ki speed breaker ban ïada naka jingpynher sted ki kali.
