Nongpoh, Risaw 24: Nalor u Dribar ba la kham mynsaw jur, ki ar ngut ruh ki nongshong ka Kali Alto ki la mynsaw, hadien ba katei ka Kali ka la leit ban tynrah ïa u Divider ka surokbah bad hadien kata ka la leit ban tynrah sa ïa kawei ka trok ba ieng harud ka surok ba la shakut syndon hapoh na ki bynta ba shadien jong ka trok.
Kane ka jingjia ka la jia mynta ka sngi ha ka por 5.40 baje mynstep ha Umdihar, ha kaba katei ka Kali Alto kaba don ïa u number ML 05-W- 5094 ka la tynrah ïa ka trok kaba don ïa u number Number AS-01-DD-9728 kaba ieng harud ka surokbah.
Ha kane ka jingjia, la ong ba u dribar uba niah ïa katei ka Kali Alto ba la tip kyrteng kum u Kynrong Dkhar (23) u la mysnaw jur ba ka Kali kaba u niah ka la sahkut shapoh ka Trok bad ki ar ngut pat kiba la mynsaw ki kynthup ïa u Rep Dkhar bad u Kharlong Dkhar kiba dei na ka shnong Wapung, East Jaintia Hills.
La ong ruh ba ïa kine kiba la mynsaw la rah noh sha Civil Hospital Nongpoh ban ioh ïa ka jingsumar bad la lah ruh ban sei ïa u dribar hadien 20 minit na ka jingïarap ki bor pulit bad ki paidbah kiba la lap halor kane ka jingjia ba sngewsih.
Kumba la ioh lum jingtip, la ong ba kitei kiba la mynsaw ki dei kiba wan na Wapung, East Jaintia Hills ha kaba ki dang thmu ban leit sha Guwahati, hynrei da ka jingpynher sted palat ïa ka kali ki la ïa kynduh ïa katei ka jingjia kaba sngewsih haduh ba la julor ka Kali bad ruh ki la mynsaw na kane ka jingjia.
Na ka liang ki Pulit ki la tan noh ruh ïa kitei ki Kali sha Thanad bad ruh ban pynlong ïa ka jingtohkit kaba kham bniah halor kane ka jingjia kiba dei katkum ki kyndon jong ka ain.
