Nongstoiñ, Nohprah 11: Ka Rambrai Jyrngam Block Congress Committee mynta ka sngi ka la ïoh ban pynlong ïa ka jingïalang paidbah ha Sawtalad kawei na ki shnong kaba ha ka thaiñ Mawdoh Rambrai West Khasi Hills District.
Ha katei ka sngi la ïadonlang ruh ki nongpeit pyrman kiba la thung da ka District Congress Election Committee, kiba la leit khnang ban lum jingtip la ki don haduh katno kiba pan ticket na ka bynta ka elekshon MDC.
Hadien ka jinglum jingtip bniah lyngba ki kot ki sla, la shem ba na katei ka Block la don tang uwei u ba la pan ticket ban ïakhun ïa ka MDC na ka seng bad uta u long u bah Bormanding Nonglang u ba long ruh ha kajuh ka por u District President ka party Congress.
Ha kane ka sngi kum ka dak jong ka jingmynjur lang ïa u bah Bor ba un ïeng kum u kyrtong MDC na ka Rambrai Jyrngam konstitwensi, ki paidbah ki la rah ïa la ki kti ban pynshisha ba na ka Block ka la mynjur lang bad ka la ibit ïa utei u rangbah, ban mih madan na ka seng Congress sha ka election MDC ka ban sa long ha u snem 2025. La ong ruh ba ïa katei ka rai yn phah ïa ka shithi ban pyntip sha ki bor kiba halor jong ka seng Congress.
Ha katei ka sngi la ïadonlang ruh ka kong Joyfulness Marweiñ Lamphang ka Mahila Congress West Khasi Hills District, u bah J.T.S Thongni MDC barim ka Rambrai Jyrngam konstitwensi, ki nongïalam na ka Garo Zone bad kiwei kiwei.
