Shillong Naitung 09: U Symbud CEM ka KHADC uba khmih ïa ka tnat Elaka u Bah P N Syiem u la ong ba ka Executive Committee jong ka Council ka la mynjur ïa ka jingai jingmut bad ka jingtyrwa jong ka Delimitation Committee ha kaba ïadei bad ka jingdonkam ban phiah noh ïa ki konstitwensi jong ka KHADC.
Ïa kane u la pyntip haba ïakren bad ki lad pathai khubor hadien ka jingïalang ka Executive Committee ka Council ha ka sngi ba-ar.
U la ong ba ka ju dei ka kamram ba dei ban wanrah shuwa hapoh ka EC haba ïadei bad ka kaiphod ne report jong ka Delimitation Committee ha shwa ban rah sha ka Ïingdorbar Thaw aiñ ka KHADC ban ïoh ïa ka jingmynjur bad u la ïathuh ruh ba ha kane ka EC la ïakren ruh halor ki ammendment rules khnang ban lah ban pynlong aiñ noh bad ban ïoh ka jingmynjur na u Lat ka jylla.
Haba ïadei bad ka jingkheiñ halor ka jingdon ki nongthep vote ha ki konstitwensi, u Bah P N Syiem u la ïathuh ba na kadaw ba ka Delimitation Committee kam shym la ïoh lad ruh ban khmih ïa ka jingdon kiba thep vote ha South West, West Khasi bad kiwei kiwei ban ïoh ïa ka average kiba thep vote, hynrei na ka liang jong ki, ki la pyrshang katba ki lah ban pynbiang ne adjust kum na Mawlai kaba lah heh ki la pyrshang ban wanrah noh sha Jaïaw bad Pynthorumkhrah.
U la iatuh ba na ka bynta ka Laitumkhrah namarba ba ka Laban Mawprem ka la rit kin hap ban pynbiang lang bad ka Laitumkhrah, kum ka Nongthymmai donkam ban adjust lang bad ka Laitumkhrah, nangta ka Pynthorumkhrah bad ka Mawlai bad ïa ki jingtip ba bniah ynsa ai ha ka sngi Balang kaba dei ka sngi sdang jong ka Dorbar Lyuir ka KHADC.
U la bynrap ruh da kaba ong ba ka jingwan rah ïa ka Ammendment rules ka KHADC kaba long katkum ka rules 6 sub rules 3 jong ka Election rules jong ka KHADC ha kaba ha kane ka Appendix 2 ka kren shaphang ki 29 tylli ki konstitwensi balei hap ban wanrah ïa ka Ammendment namar kin don ki shnong ban hap sei na kawei ka konstitwensi ban buh pat sha kawei pat bad ïa kane ki ong ka Ammendment rules 2024 ha shwa ban ïoh ka jingmynjur jong ka ïing bad ban ïoh pynlong aiñ lyngba ka jingmynjur jong u Lat.
