Ka shong ha ka rai ka DCA bad u Lat ka jylla ban pynlong ïa ka MDC elekshon: Dy. CEM KHADC

Shillong Naitung 09: Ka Executive Committee jong ka Khasi Hills Autonomous District Council (KHADC) ha ka sngi ba-ar ka la ïakren ïa ki katto katne ki mat kiba ïadei bad ki kam ka Council kiba kynthup ïa ka kaiphod halor ka elekshon Sirdar hapoh Nongjri Sirdarship bad ha Rambrai Elaka nalor ki kam ba ïadei ruh bad ka elekshon MDC.
Haba iakren bad ki lad pathai khubor u Bah P N Syiem Symbud CEM ka KHADC hadien ba la wai ka jingïalang ka EC u la ong ba ha ka EC la ïakren ruh halor ka tnat Fisheries ka Council namar la ïohi ba ka Tnat ka la pulom ban pynïaid ïa ki pung Dohkha ka Council kaba don ha Ri Bhoi District bad ka Tnat kam shym lah ban pynïaid kam bha ban pynmih khajna bad kumta la ai jingmut ïa ka tnat ban khmihbniah ban pule bniah la ka don ne em ka lad ban aiti pynïaid noh da ki riew shimet khnang ba kan don ka jingmih ne ka revenue ïa ka KHADC.
Haba ïadei pat bad ka jingkylli la kane ka Dorbar Lyuir ka KHADC kan dei ka sien shong kaba khatduh ïa ka EC kaba mynta naba la dep ïoh ïa ka kaiphod ka Delimitation Committee bad ban ïoh pynlong noh ïa ka elekshon MDC, u Bah Syiem u la ong ba lehse ka lah ban dei kaba khatduh bad ka lah ruh ban long ban dang ïoh ka lad sa kawei ka Ïingdorbar ka KHADC bad kane ka shong eh ha ka sorkar jylla lyngba ka Tnat District Council Affairs (DCA) ka sorkar jylla bad u Lat ka jylla lano yn pynlong noh ïa ka elekshon MDC ha ka jylla.