Delhi: Ka Cabinet Committee on Economic Affairs (CCEA) ba khlieh da u Myntri Rangbah Duh, u Narendra Modi mynta ka sngi ka la ai jingmynjur ïa ka song ba kyrpang jong ki skhim ba saiñdur thymmai na ka bynta ki nongrep ha ka jingmang tyngka kaba T.3,70,128.7 klur. Kine ki skhim ki dei na ka bynta ka bha ka miat jong ki nongrep da kaba kyntiew ïa ka kam rep kaba ïaineh. Kine ki sienjam kin kyntiew ïa ka ïoh ka kot jong ki nongrep, pynkhlaiñ ïa ki rukom rep tynrai rep organic, khyllie im ïa ka jingseisoh jong ka khyndew bad pynthikna ka jingshngaiñ ha ka bam.
Ka CCEA ka la ai jingmynjur ïa ka jingbteng jong ka skhim Urea Subsidy ban pynthikna ba ki nongrep ki ïoh ïa ka urea ha ka dor T 242/ 45 kg ïa ka shi borni kaba kynthup lang ïa ki khajna bad ki bai sop neem. Na kane ka song ba la kdew halor, T. 3,68,676.7 klur ka dei na ka bynta ka urea subsidy ha ki lai snem (2022-23 to 2024-25). Kane ka lait na ka Nutrient Based Subsidy kaba la ïoh jingmynjur dang shen kaba T. 38,000 klur na ka bynta ka samoi Kharif ha u snem 2023-24. Ki nongrep kim donkam ban lut shuh shuh ban thied urea, bad kane kan hap pynjem ïa ki jinglut jingsep jong ki. Mynta, ka dor jong u urea ka long T.242 ïa shi borni ba 45 kg u urea (kaba lait na ka bai sop neem bad ka khajna), katba ka dor kaba shisha ka long kumba T. 2200. Kane ka skhim ka dei kaba bei tyngka pura da ka Sorkar India lyngba ka jingkyrshan ka mang tyngka. Ka jingbteng jong ka skhim Urea Subsidy kan pynbun ruh ïa ka jingshna hapoh ri ïa u urea khnang ba ngin lah ban pyndap ïa ki jingdonkam.
Namar ki jingkylla ha ka jingïadei hapdeng ki ri bad ka jingkiew dor ki mar, ka dor jong ki sboh ka dei kaba la kiew bun bun shah ha baroh kawei ka pyrthei ha kine ki snem ba la dep. Hynrei ka Sorkar India ka la ïada ïa ki nongrep jong ka ri na ka jingkiewdor ki sboh da kaba kyntiew ïa ka subsidy na ka bynta ki sboh. Ha ka jingpyrshang jong ka ban ai jingïada ïa ki nongrep, ka Sorkar India ka la kyntiew ïa ka subsidy na ka bynta ki sboh na ka T. 73,067 klur ha u 2014-15 sha ka T. 2,54,799 klur ha u 2022-23.
La pynkhlaiñ ïa ki kam kiba ïadei bad ka Nano Urea
Shuwa u snem 2025-26, yn sdang pyntreikam ïa phra tylli ki Nano urea plant kiba lah ban pynmih 44 klur bilor kiba kot sha ka 195 LMT u urea. Ki sboh Nano ki pyllait ïa ki jingpynkhlaiñ ha ka rukom kaba lah ban pynïaid bha bad kane ka wanrah ïa ka jingpyndonkam kaba kham bha ïa kine ki jingpynkhlaiñ bad ki pynduna ruh ïa ka jinglut jingsep jong ki nongrep. Ka jingpyndonkam ïa ka Nano Urea ka la wanrah ïa ka jingkiew ha ka jinglah pynmih mar bam.
Ka ri ka don ha ka lynti ban long Atmanirbhar ha u Urea shuwa u 2025-26
Ka jingseng thymmai bad jingkhyllie im ïa 6 tylli ki jaka pynmih urea ha Chambal Ferti ltd. – Kota Rajasthan, Matix ltd. Panagarh West Bengal, Ramagundam-Telangana, Gorakhpur-UP, Sindri-Jharkhand bad Barauni-Bihar naduh u 2018 ka la ïarap ïa ka ri ba kan long atmanirbhar ha kaba ïadei bad ka jingpynmih bad jingpynbiang ïa u urea. Ka jingpynmih urea ha ka ri ka la kiew na ka 225 LMT ha u 2014-15, sha ka 250 LMT ha u 2021-22. Ha u 2022-23, ka jinglah pynmih urea ka la kiew sha ka 284 LMT. Kine baroh ha ryngkat ki jaka pynmih Nano Urea kan pynduna ïa ka jingshaniah jong ngi ha ka jingthied nabar ri ïa u urea bad kan pynlong ïa ngi kiba lah ban pyndap ïa ki jingdonkam shuwa u snem 2025- 26.
PM Programme for Restoration, Awareness Generation, Nourishment and Amelioration of Mother – Earth (PMPRANAM)
Ka mei mariang ka dei kaba la pynbiang bun ki tyllong na ka bynta ki briew. Ka long kaba donkam ban phai biang sha ki rukom rep tynrai bad ka jingkyntiew ïa ka jingpyndonkam ïa ki dawai sboh ha ka rukom kaba ryntih bad kaba lah ban kyrshan. Ka jingkyntiew ïa ki rukom rep tynrai, rep organic, kiwei kiwei ki jait sboh, ki jingsaiñdur thymmai kum ki sboh Nano bad sboh bio ka lah ban ïarap ha ka jingkhyllie im biang ïa ka jingseisoh ka mei mariang. Kumta la pynbna ha ka mang tyngka ba yn sdang ïa ka “PM Programme for Restoration, Awareness Generation, Nourishment and Amelioration of Mother – Earth (PMPRANAM)” ban ai jingmyntoi ïa ki Jylla / Union Territory ba kin kyntiew ïa kiwei kiwei ki sboh bad ka jingpyndonkam ïa ki dawai sboh kaba don ka jingbahkhlieh.
T. 1451.84 klur ka dei kaba la ïoh jingmynjur na ka bynta ka Market Development Assistance (MDA) ban kyntiew ïa ki Sboh Organic na ki Gobardhan Plant
Ka song ba la ïoh jingmynjur mynta ka sngi ka kynthup ruh ïa ka rukom ai jingmyntoi na ka bynta ka jingkhyllie im, ka jingpynsboh, bad ka jingpynbha ïa ka mei mariang. Ka skhim Market Development Assistance (MDA) kaba T 1500 ïa man ka MT ban ai jingkyrshan ïa ki sboh organic lyngba ki Fermented Organic Manures (FOM)/Liquid FOM/Phosphate Rich Organic Manures (PROM) kiba pynmih kum ki jingtam na ki Bio- gas Plant/Compressed Biogas (CBG) Plant ka dei kaba dang sdang hapoh ka kam GOBARdhan.
Kine ki jait sboh ki dei ban don ki kyrteng Bharat Brand FOM, LFOM bad PROM. Ha kawei ka liang, kane kan pynbeit ïa ka jingeh ha ka jingpyndonkam ïa ki mar kiba tam na ki kam rep bad ki jingeh kiba mih na ka jingthang Parali, bad kan ïarap ruh ban pynkhuid ïa ka mariang bad wanrah jingshngaiñ jong ka mariang ha ryngkat ka jingwanrah sa kawei ka lad kamai ïa ki nongrep. Ki nongrep kin ïoh ïa ki sboh organic (FOM/LFOM/ PROM) ha ka dor kaba jem.
Kane ka sienjam kan plie lad ïa ka jingpyntreikam ïa ka jingpynbna ha ka mang tyngka ïa ka jingsdang 500 tylli ki jaka pynmih spah na ki mar ba tam hapoh ka skhim GOBARdhan ban pyntyllun shuh shuh ïa ka ïoh ka kot da kaba kyntiew ïa ka jinglah pyntreikam ïa kine ki BG/CBG plant.
Ka jingkyntiew ïa ki rukom rep tynrai kum ki rukom rep ba lah ban ïaineh ka la wanrah ïa ka jingkhyllie im biang ïa ka jingseisoh jong ka khyndew bad ka jingpynduna ïa ka jinglut jingsep jong ki nongrep. 425 tylli ki KVK (Krishi Vigyan Kendra) ki la pyni ïa ki rukom rep tynrai bad ki la pynlong 6,777 tylli ki prokram ai jingtip ha kaba la ïashim bynta 6.80 lak ki nongrep. La pynbiang ruh ïa ki rukom ai jinghikai ha ki rukom rep tynrai ïa ki prokram BSc bad MSc bad ïa kane yn pyntreikam ha ka samoi ai jingpule kaba sdang ha u Naitung- Nailar 2023.
Ka jingwanrah ïa u urea ba sop Sulphur (Urea Gold); ban pyndap ïa ka jingduna sulphur ha ka khyndew bad pynduna ka jinglut jingsep jong ki nongrep
Sa kawei ka sienjam ha kane ka song ka dei ka jingwanrah nyngkong ha ka ri ïa u urea ba sop sulphur. Une u dei uba kham jem dor bad uba kham treikam ban ïa u urea ba sop neem ba pyndonkam mynta. Kane kan pynbeit ïa ka jingduna sulphur ha ka khyndew hapoh ka ri. Kan pynduna ruh ïa ka jinglut jingsep jong ki nongrep bad kyntiew ïa ka kamai kajih jong ki nongrep lyngba ka jingkiew ka jinglah pynmih mar rep.
Poi ki Pradhan Mantri Kisan Samruddhi Kendra (PMKSK) sha ka shi lak
Kumba shi lak tylli ki Pradhan Mantri Kisan Samruddhi Kendra (PMKSK) ki la don ha ka ri. na ka bynta ka jingsuk jong ki nongrep, ïa ki jingdonkam ha ki kam rep la pynbiang ha kawei ka jaka ban pynbiang ïa ki jingdonkam jong ki nongrep.
Ki jingmyntoi:
Kine ki skhim ba la ïoh jingmynjur kin ïarap ha ka jingpyndonkam ïa ki sboh dawai ha ka rukom ba don jingbahkhlieh bad kane kan pynduna ïa ka jinglut jingsep jong ki nongrep. Ka jingkyntiew ïa ki rukom rep tynrai, rep organic, kiwei kiwei ki jait sboh kum ki sboh Nano bad ki sboh organic kan ïarap ha ka jingkhyllie im biang ïa ka jingseisoh jong ka mei mariang.
i. Ka jingbha shuh shuh jong ka khyndew ka wanrah ruh ïa ka jingkiew jong ki jingpynkhlaiñ bad ka mariang kaba shngaiñ namar ka jingduna ka jingpynjaboh ïa ka mariang. Ka mariang kaba khuid bad kaba shngaiñ ka wanrah ïa ka koit ka khiah jong ki briew.
ii. Ka jingpyndonkam kham bha ïa ki mar ba tam na ki kam rep kum ki parali kan pynbeit ïa ka jingeh kaba mih ha ka jingpynjaboh ïa ka lyer bad kan kyntiew ïa ka jingkhuid jingsuba, ka mariang bad ka jingpynkylla spah ïa ki mar ba tam.
iii. Ki nongrep kin ïoh shuh shuh ïa ki jingmyntoi – Kim donkam ban pynlut shuh shuh na ka bynta u urea namar u bteng ban don ha ki dor kiba jem. Ki sboh organic (FOM/ PROM) kin don ha ka dor kaba biang. Lyngba u Nano urea bad ka jingduna ka jingpyndonkam ïa ki dawai sboh bad ka jingkiew ka jingpyndonkam ki sboh organic, ka jinglut jingsep jong ki nongrep kan hiar. Ka jinglut jingsep kaba duna ha ryngkat ka khyndew kaba seisoh bad ka um kaba khuid kan kyntiew ïa ki jingmih na ki kam rep. Ki nongrep kin ïoh ïa ki jingïohnong kiba kham bun na ki mar rep jong ki.
