Mynjur ka Cabinet ban ym kheiñ ïa ki nongaplai kam ba la heh rta ha Department of Textiles

Shillong, Nohprah, 19: U Myntri Rangbah ka Jylla Cornad Kongkal Sangma ha ka sngi Baar u la ïathuh ba ka Kynhun Myntri jong ka Sorkar Jylla ka la mynjur ban ym kheiñ satia ïa ki nongaplai kam kiba la heh rta hapoh ka Department of Textiles.
Naduh u snem 2015, ka Department of Textiles ka la pynsangeh ïa ki jingthungkam bad ïa ki eksamin. Kane ka la wanra jingeh khamtam ïa kito kiba la pyndep ïa ki jingshah hikai pyntbit jong ka Sericulture & Handloom Sector, kï la ïoh baibam ruh na ka Sorkar. Wat hapdeng ka jingpyndep pura ïa ki jingpule bapher bapher, ki nongaplai kam ki la hap ban shu ap sah ïa ki jingshah thungkam, ïa kaba yn hap ban leh katkum ka jingbishar bniah.
Haba kren halor ka mat, u Myntri Rangbah u la ïathuh ruh ba jingpynbeit ïa ka jingsahteng ban thungkam ka la jia naduh u snem 2015. Ban weng ïa kane ka jingeh, ka Kynhun Myntri ka la rai ban pynlong ïa ki eksamin, da kaba ailad ïa ki nongaplai kam kiba la pyndep ïa ki jingshah hikai pyntbit ha ki jaka pule ba la ïoh jingithuh da ka tnat ki lah ban aplai ïa ka kam. Ïa ka jingthungkam yn leh da ka lynti kaba pyrkhing bha.
Ka jingeh kaba mih mynta ka long ba 115 na ki 196 kiba la pyndep ïa ka jingshah hikai pyntbit ki dei kiba la palat ka rta thungkam. Da kaba wanrah ïa ki kyndon kiba kyrpang, ka Kynhun Myntri ka la shim ïa kawei ka rai ban ym kheiñ shuh ïa ka rta jong kito kiba la palat ka rta thungkam hapoh ka Department of Textiles.
La khmihlynti ba kane ka rai kan plie ïa ka jingkhang na ka bynta ki nongthepkam kiba la don jingtbit kiba la ïai ap khmihlynti ban ïoh rung kam hapoh ka tnat.
U Myntri Rangbah u la pynpaw ruh ïa ka jingkyrmen ba kane ka sienjam kan pynmyntoi ym tang ïa ki nongaplai kam kiba la heh ka rta hynrei kan pynkylla dur ruh wat ïa ka Department of Textiles.