Shillong, Jymmang 25: Ka Nongkseh SSCC bad ka Shillong Lajong FC ki la pyndep marïabud ha ka kyrdan ba nyngkong bad ba-ar ha ka Group A jong ka wat ïakhun Quarterfinal league stage ka lympung 5th Meghalaya State League hadien ba baroh ar tylli ki la jop ïa la ki jong ki jingïalehkai ba khatduh hynne ka sngi Nyngkong ha SSA Stadium.
Shuwa ka jingïalehkai hynne ka sngi baroh ar ka Nongkseh bad ka Lajong ki ladep ban pynthikna ba kin pyndep ha ka thup kyrdan Top 2 na ka Group A, hynrei kaba sah ka long tang ban rai kano ka liang kan pyndep ha ka kyrdan ba nyngkong bad kano ka ban bud ha ka kyrdan ba ar.
Ha ka jingïalehkai kaba nyngkong, ka Lajong ka la lah ba kan pynliem da 2-0 ïa ka Rangdajied United FC, katba ka Nongkseh ka la jop da 2-1 ïa ka Mawlai SC ha ka jingïalehkai kaba bud ha ka por janmiet.
U Fridison Wanniang u la nang pynskhem ïalade ha ka kynhun kaba thymmai hadien ba u la kynriah na ka Laitkor SC shwa ka MSL, da kaba pynkhih ïa baroh ar tylli ki kol (ha ka minit kaba 42 & 54′) jong ka Lajong ha ka jingïakhun pyrshah ïa ka RUFC. Da kaba ïoh 7 kol mynta u dei u nongthep kol ba bun tam jong ka Lajong.
Ha kawei pat ka liang, kam shym la don ka jingkut kaba kyrpang na ka bynta ka Rangdajied, ha kaba ki la khyllem da kaba shah rem baroh hynriew sien lynter ha ki jingïalehkai Quarterfinal league stage. Kane ka lahduh jong u snem 2023 ka la rung da ka said na ka Group H sha ka pre-quarterfinal, bad jam shaduh ka extra time ban pynliem ïa ka Janepih YSCA.
Da ka jingjop jong ka Lajong, ka Nongkseh ka donkam ban khur pura 3 poiñ pyrshah ïa ka Mawlai, lahduh jong ka MSL 4, khnang ban pynthikna ïalade ha ka kyrdan ba ha khlieh duh jong ka Group.
Ka Nongkseh ka la sdang da kaba pynkhihjar dang kloi lyngba u Chesterpaul Lyngdoh (8′) bad tang hadien katto katne minit, u Sheen Sohktung (14′) u la pynjlan ar shah ïa ka kol lamkhmat. U Syndongmiki Lyngdoh (46′) u la ïoh ban pynphai shi kol na ka bynta ka Mawlai ha ka minit ba nyngkong jong ka kylla miet.
Ka Nongkseh, kaba ïakhun ïa ka MSL ba nyngkong, kam shym la shah rem ha ki 13 tylli ki jingïalehkai – bad ka dei tang ma ka ka kynhun ka bym pat shah rem bad lehse kane ka long ka jingai mynsiem ïa ka kynhun haba jam sha ka semifinal.
Ha kane ka sngi Ba-ar yn sakhi ïa ki jingïakhun quarterfinal league stage ba khatduh jong ka Group B, ha kaba ka Maram FC kan aireng pyrshah ïa ka Langsning FC ha ka por 2 baje nohphai sngi; bad ha ka por 6 baje jan miet ka Rymbai Shkenshynriah SC kan ïakhun pyrshah ïa ka Nangkiew Irat SC.
Ka Langsning ka ladep ban pynthikna ïa ka jaka ha ka semi, hynrei ka jingïaknieh mynta ka long hapdeng ka Shkenshynriah bad ka Nangkiew Irat. Ka Shkenshynriah ka bat ïa ka rekod jingjop (head-to-head) hadien ba pynliem ïa ka Nangkiew da 2-1 ha ka 1st leg, bad ka donkam tang ban ïakhaid ban jam shakhmat, katba ka Nangkiew Irat kan donkam beit ban jop.
