Shillong, Nailur 13 : Ka Synjuk ki nonghikai 4th Teachers hapoh ka lama jong ka Meghalaya 4th Teachers Association ka la pynpaw ba ki ai ka jingkyrshan ïa u Commissioner & Secretary ka tnad Pule Puthi ka sorkar Jylla u Vijay Kumar Mantri, bad ha kajuh ka por ban pyrshah pat ïa ka jingdawa jong ka VPP ban weng noh ïa u na ka kam.
Halor kane na ka liang u General Secretary ka Synjuk u Bah Federick Lyngdoh Tongkhar ha ka sngi Saitjaiñ u la ong ba u Vijay Kumar Mantri u la leh shibun ki kam ban wanrah ki jingkylla na ka bynta ki nonghikai. U la ong ba kawei na kine ka dei ka jingpynïaryngkat ïa ka tulop na ka bynta ka juh ka kam, lyngba ka Special Package Framework (SPF).
“Ngi pyrshah jur ïa ka jingdawa ban weng ïa u Vijay Kumar Mantri kumba ngi la la ïohi ha ki lad pathai khubor,” ong u Bah Federick.
“U kwah ban wanrah ka jingbha na ka bynta baroh ki nonghikai. Shuwa ban shim ïa kano kano ka rai, um shim rai marwei. U khot lang ïa baroh kiba don bynta,” u la bynrap.
U Bah Federick u la ong ba ka SPF ka la pynduna ïa ka jingpher kaba khraw ha ka tulop hapdeng ki nonghikai.
“Ha ki por ba la dep, ka tulop hapdeng ki skul bapher bapher ka ïapher bha. Hynrei mynta lyngba ka SPF, baroh ki nonghikai kiba la biang ka kyrdan, kiba trei kajuh ka jingkhia jong ka kam bad kajuh ka por trei, ki ïoh ka juh ka tulop na ka juh ka kam,” u la ong.
U la ong ruh ba dei ban shah ïa u Mantri ban bteng ha ka kam khnang ba un lah ban nang pynbha ïa ka SPF.
“Ngi kwah ba un bteng ha ka kam. Lyngba jong u, dang bun ki jingmut kiba ngi lah ban buh ha khmat ka Sorkar ban nang pynbha ïa ka SPF. Ngi dei ban ai khublei ïa ka Sorkar ïa kaba ka la leh na ka bynta jong ngi, bad ngi sngewkmen ba u la trei lang bad ngi,” bynrap biang u Bah Federick.
