Mih lut ki nongïalam bad ki dkhot ka HITO ha Ri-Bhoi ba shah weng ki nongïalam ba hakhmat ka District
Nongpoh, Risaw 30 : Ki nongïalam jong ka seng Hynniewtrep Integrated Territorial Organization (HITO) na Ri-Bhoi District mynta ka sngi ki la pynbna paidbah syndon ba ki la mih na ka seng HITO, kaba dei halor ka nongrim ba la kynnoh ba u President ka HITO Sengkmie u la weng ïa ki nongïalam ba hakhmat ka HITO na ka Group jong ka seng kaba ki la ïa shakri baroh shi katta khlem da tip tip ïa ka daw tynrai jong kane ka jingshah weng na ka Group jong ka seng.
Kumba la pynpaw da ki nongïalam ka HITO Ri-Bhoi District ba la mihkhmat da u General Secretary, u bah Keny Nongrum, bad u Vice President, u Bah Elvis Kyrsian, ki la pynpaw ba ka daw ba ki nongïalam ka HITO na Ri-Bhoi District ki la pynbna ba ki la mih noh na kane ka seng, ka dei namar ba u President ba rangbah ka seng, u Bah Donbok Dkhar u la weng na ka group jong ka seng ïa u President ka seng na Ri-Bhoi, u Bah Ban Kharnaior bad u Working President, u Bah Apbor Nongrum ba kum ki nongïalam bad ki dkhot na ka District kim don jingtip satia halor kane ka jingshah weng kitei ki nongïalam.
Ban pyrshah halor kane ka jingshah weng ki nongïalam ka District, ki nongïalam ka District ba la ïalam da u General Secretary, u Bah Kenny Nongrum bad u Vice president, u Bah Elvis Kyrsian mynta ka sngi ki la pynlong da ka jingïakynduh lang ha Umtrew, Umsning bad ki la shim ruh ïa ka rai ban ïa mih lut baroh naduh ki nongïalam ka District bad kumjuh ruh naduh ki nongïalam ka Unit bad ki Area kiba dei ki shnat treikam ka HITO ha Ri-Bhoi District.
Haba kren sha ki lad pathai khubor, u General secretary, u Bah Kenny Nongrum, u la ong baroh ki nongïalam ka HITO na ka District bad na baroh ki shnat treikam ki la rai ban mih noh na ka seng HITO bad ka daw kaba ki la pynpaw ka dei hi halor ka nongrim ka jingshah weng u President bad u Working president ka HITO na District khlem ka jingtip jong ki dkhot ka seng na Ri-Bhoi.
Namarkata, kitei ki nongïalam ki la pynpaw ba kum ka dak ka jingïatylli bad ka jingshaniah ïa ki nongïalam ka District ki la shim lang ka rai ban mih noh baroh kum ki nongkitkam bad ki dkhot ka HITO na Ri Bhoi bad ban bteng pat ïa ka jingshakri sha ki paidbah ki la rai ban pynïasoh noh ïa kawei ka seng ba la tip kum ka Ri Bhoi Youth Welfare Organization kaba la seng naduh u snem 2017 ba ka jingthmu ka long ban shakri ïa ki paidbah ka them Ri Bhoi, ong u Bah Kenny Nongrum.