Mih ki thei U-18 ka Touchline Basketball Academy ban leit ïashim bynta sha ka lympung ha Thailand

Shillong, Naitung 17: Ka Touchline Basketball Academy hynne ka sngi Thohdieng ka la pynbna ba ka kynhun ïalehkai ki khynnah kynthei U-18 ki la mih na nongbah ban leit sha Thailand ban ïashim bynta ha ka International Youth Basketball Championship (IYBC) 2026, kawei na ki lympung ïalehkai basketball ba pawnam jong ki khynnah samla ha Asia.
Kane ka kynhun kaba don 12-ngut ki nongïalehkai kan leit naduh ka 20 tarik u Naitung bad ka lympung kan long naduh ka 24 haduh ka 28 tarik u Naitung.
Katba ka Academy ka dang rakhe ïa ka jingdap 10 snem jong ka, kane ka jingleit ïashim bynta ka long kum u mawjam ha ka jingshimkhia jong ka ban kyntiew ïa ki sap ïalehkai basketball naduh dang rit na Meghalaya.
Kane ka lympung kan wanrah lang ïa ki kynhun ïalehkai ba pawnam na kylleng ka pyrthei, kaba ai ïa ki nongïalehkai ïa ka jingshemphang kaba kordor bad ka lad ban ïakhun ha ka kyrdan kaba ha khlieh duh.
Ka Touchline ka la shah thup ha ka pool kaba jur bha ka jingïakhun, ha kaba ka kynhun kan hap ban ïakhun pyrshah ïa ki kynhun kiba na USA, South Korea, Thailand bad Malaysia ha ka wat ba nyngkong.
Kane ka lympung ka kular ban pynpaw pyrthei ïa ki rukom ïalehkai basketball bapher bapher katba ka ailad ïa ki ban ïakhun pyrshah ïa ki katto katne ki samla kiba kynsai tam ha ka thaiñ bad shabar.
Ka kynhun ka la ïaid lyngba ki bnai jong ka jingpynkhreh, kynthup ïa ka jingpyntbit ha ka liang ka buit (technical training), ka jingpynjanai ïa ka sap (tactical development), bad ruh ha kaba ïadei bad ka jingkhlaiñ bad ka jingpynkhreh ïa ki jingïalehkai ban ïakhun.
Ka jingïashim bynta ha kane ka lympung ka long shi bynta jong ka jingthmu kaba neh slem jong ka Academy ban thaw ïa ki lad ki lynti ha ka pyrthei na ka bynta ki samla ïalehkai na Meghalaya.
Ia kane ka kynhun yn ïalam da u bah Andrew Suting kum u Head Coach bad ka kong Ucilia Pyngrope kum ka Assistant Coach, kiba la khmih ïa ka jingpynkhreh jong ka kynhun ha kine ki katto katne bnai ba la dep.
Haba kren shuwa ba ka kynhun kan mih noh, u Heh jong ka Academy Coach u Sanjib Das u la ong, “Kane ka lympung ka dei ka kabu na ka bynta ki samla ïalehkai jong ngi ban tynjuh ïalade pyrshah ïa ki katto katne ki kynhun samla ba kynsai tam na kylleng ka pyrthei. Ban ïalehkai pyrshah ïa ki kynhun na USA, South Korea, Thailand bad Malaysia kin tynjuh ïa ngi ha baroh ki liang, ka met bad ka jingmut jingpyrkhat, bad ngi sngewkmen ban mihkhmat ïa ka Meghalaya da ka jingsngew sarong”.
“Man la ka jingïalehkai kan long ka jinghikai kaba lah ban ïarap ïa ka jingroi jong ki nongïalehkai jong ngi ha ka por ka ban neh slem” u la bynrap.
Ka Touchline Basketball Academy ka pynpaw ïa ka jingsngewnguh kaba khraw ïa ki kmie ki kpa, ki nongkyrshan, kiba la noh synñiang kiba da ka jingai mynsiem bad jingnoh synñiang jong ki la pynlong ïa kane ka jingleit ïashim bynta ban urlong.