Mih ki nongtrei sorkar ryngkat ki tum ki tam ban leit sha ki Polling Station

Don 95 tylli ki Polling Station ha Ri Bhoi kiba don jingma bad 54 tylli ki Polling Station kiba kham don jingma, ong u DC ka Ri Bhoi

0

Nongpoh, February 26 : Kumba ka 27 tarik u Rymphang 2023 ka dei ka sngi kaba ki paidbah kin jied thymmai ïa ki nongmihkhmat ka la poi hapoh ka jylla ha kaba na ka liang ki bor sorkar ki la pynkhreh ban pynïaid beit ïaid ryntih ban ym mih kano kano ka huri hura kaba ktah ïaka shongsuk shongsain ki paidbah bad ha Ri Bhoi District katkum ka jingtip ba la ioh lum ki don haduh 95 tylli ki Polling Station kiba don jingma (Critical) bad 54 tylli ki Polling Station kiba kham don jingma shuh shuh (Vulnerable).
Ïa kene la pyntip da u District Election Officer ka Ri Bhoi, u Arpirt Upadhaya haba kren bad u Nongthoh Khubor mynta ka sngi u Blei shuwa ba ki nongtrei sorkar bapher bapher ki la kreh la ki tum ki tam ban poi sha ki Polling Station na ka bynta ban pynïaid beit ïaid ryntih ïa kane ka jingjied ïa kita ki Nongmihkhmat na Ri Bhoi District.
U la ong ruh nalor kitei kitei ki 95 tylli ki Polling Station ba don jingma bad 54 kiba kham don jingma shuh shuh ki ar tylli ki Polling Station ki dei kiba don jingma bad khamma shuh shuh kata ka kynthup ïa ka Polling Station ha Tyrso A bad Tyrso B ba hap ha ka Mawhati Polling Station.
“Ban ïaid beit ïaid ryntih kane ka jingjied ïa ki nongmihkhmat na ka liang ka bor synshar district ka la peitngor bha bad la phah ruh ïa ki bor pulit bad ki CRPF sha man la ki Polling Station bad khamtam ha kitei ki jaka ba don jingma la pynjur da ki bor pahara khnang ban ïaid beit ïaid ryntih kane ka election jied nongmihkhmat ha ka jylla” ong u District Election Officer ka Ri Bhoi.
Shuh shuh, u la buh ruh ka jingkyrpad sha baroh ki paidbah nongshong shnong ka Ri Bhoi ba kin leit ban jied ïa ki nongmihkhmat da ka jingtip briew tip blei bad ba kin ai ka jingïatrei lang bad ka bor sorkar na ka bynta ban ïaid beit ïaid ryntih kane ka election jied nongmihkmat khnang ba kan nym ktah ïa ka shongsuk shongsain ki paidbah hapoh ka District, u la bynrap.
Ha kawei pat ka bynta, kumba long mynta ka sngi, la sakhi ba ki nongtrei sorkar na Ri Bhoi District kynthup naduh ki Returning Officer, Assistant Returning Officer, ki Sector officer bad ki Zonal Magistrate ki la bun kama ban leit shim ïa ki tum ki tam kiba kynthup naduh ka EVM, VVPAT, CU bad kiwei kiwei ki jngdonkam ban pynpoi sha man la ki Polling Station ha Ri Bhoi na ka bynta ka jingïaid beit ïaid ryntih kane ka election jied nongmihkhmat na Ri Bhoi District.
Kine ki ophisar sorkar bad ki nongtrei sorkar ki la leit sah lypa naduh mynta ka janmiet sngi u Blei ban poi sha ki Polliong Station ba la bynshet kam ïa ki bad kum ki nongtrei sorkar da ka jingkitkhlieh ki la wan shim ïa ki tum ki tam kum ka jingpynkhreh ban pynïaid beit ïaid ryntih ïa ka election ba la sakhi ba ki la wan shim ïa ki tum ki tam na EVM bad Material Cells ba la buh ha Nongpoh kum ka Head Quarter ka Ri Bhoi district.

Leave A Reply

Your email address will not be published.