Mih ka huri hura ba kynnoh khrong khajna na ki trai shnong ha Weighbridge Byrnihat

Nongpoh, Nailar 05: Da ki spah ngut ki paidbah naki jait bynriew bapher bapher kila mih paidbah hynne ka step hadien ka huri hura kaba mih ha khyrdop khrong khajna (Weighbridge) kaba don haka shnong Amjok Byrnihat bala kynnoh ruh ba la khrong pisa wat ïaki mar ki mata jong ki trai shnong sha katei ka thaiñ.
Katkum ka jingtip bala ioh lum, la ong ruh ba katei ka jingkajia kala sdang naduh hynnin ka step haka por 2 baje eiei hapdeng ki briew kiba trei ha katei ka weighbridge bad ki katto katne ki briew na katei ka thaiñ kiba la khleh jaitbynriew naduh ki Garo, Nepali bad kiwei kiwei, hynrei katei ka jingkajia kala nang pur bad nang heh hynne ka step haduh ka por 11 baje eiei kaba la mih ruh ka jingïashoh ïadat da ki paid bhur ïaki nongtrei katei ka weighbridge bala don ruh ka jingïaktah kti mar kylliang.
La ong ruh ba ha katei ka jingïakulmar, u wei u nongap khyrdop ba dei ruh u wei naki nongïalam ka KSU Ri-Bhoi bad uwei naki rang ïakura ba paw ka jylla, u la ktah kti ïa uwei u nongñiah auto bala tip kyrteng kum u Durga Thapa haduh ba u la mynsaw jur bad pynkit sha Civil Hospital Nongpoh.
Naka liang ki pulit bad majistor hadien ka jingioh jingtip kila her mar mar sha katei ka jaka naka bynta ban tem ïaka huri hura bad dei da ka jingpoi kloi ki pulit la lah ban tem ïaka jingïakulmar, bad naka liang ki bor district kila khang khyrdep syndon ïa katei ka weighbridge.
Halor katei ka jingjia naka liang ki pulit kila kem bad rah noh ïa u Johny Nongrum sha Nongpoh Police Station naka bynta ban pynlong ka jingtohkit bad register case halor katei ka jingjia.