Shillong, Rymphang 8: U MLA uba dei u kyrtong ka National People’s Party (NPP) na Jowai, u Bah Wailadmiki Shylla u la ong ba ba ha ki 5 snem ba la dep u la lah ban pyndep shibun ki kam kiba sahteng jong ka Constituency ba kynthup ïa ka Umngot Water Supply Scheme kaba la shu sahkut mynta la 20
snem.
Ha kaba ïadei bad ki kam ba sahteng kiba la mih ruh shibun ki jingkynthoh, u la ong ba ha kaba ïadei bad ka Iawmusing Shopping Complex, kaba dei ka jingangnud jong ka thaiñ baroh kawei, ka daw jong ka jinghap ban sangeh ka long namar ka jingbym treh shuh jong u kontraktor ban trei pyndep, kaba la pynlong ïa ka Sorkar ban hap ban khot tender da thymmai.
U la ong ba na ka liang jong u kum u nongmihkhmat u la wanrah shuh ruh ïa ka pisa ban pyndep ïa katei ka complex, hynrei u kontraktor ba pyntrei u la leit pynban sha ïingbishar ban mudui da ka mukotduma, kaba la pynlong ïa kane ka kam ban sahteng haduh mynta.
Ha kaba ïadei bad ka niut hapoh ka Sor Jowai, u la ong ba ha ki 28 snem ym shym la don kiba leh eiei ïa kane, kumta u la kyntu ïa ki paidbah ban long kiba ïaishah, da kaba bynrap ba lada ym dei ba pyndik ka khlam Covid ïa kane ka kam la dep ban pynbeit.
U Bah Wailad u la leit ban thep kyrteng mynta ka sngi ha kaba la synran lang ïa u da ki hajar ngut ki nongkyrshan ryngkat ka jingkynhoi bad risa. Haba kylli, u la ong ba ka jingwan jong ki paidbah ban synran ïa u kadei namar ka jingieid ba ki don bad ka jingsngewjan ka jong ki.
Ha kaba ïadei bad ka B.Ed College ha Jowai, u la ong ba haduh mynta ïa kane ka kam u dang buddien, tangba namar ba ka Sorkar pdeng ka la pynmih ïa ki kyndon ba ym lah ban plie ïa ka B.Ed College kiba dei ki Stand Alone College, hynrei donkam ïa ka B.A. bad B.Ed College, ha kaba u la ong ban pynbiang ïa kine ki kyndon ka Sorkar ka la leh tangba namar ka jingwan jong u Covid 19 ha ki 2 snem ka la sahteng noh.
