Shillong, Risaw 08 : Ka jingïakhun knieh rung sha ka final ha ka lympung ïalehkai jong ka Meghalay Youth League (MYL) ha ka thup ki heprit ba hapoh 14 snem bad kiba hapoh 16 snem kan long mynta ka sngi Balang ha ki ar tylli ki madan ïalehkai, kata ha madan Sports Authority of India centre kaba ha NEHU bad ruh ha Madan MFA Polo, Shillong.
Haba phai sha ka jingkhun ïa ka semi final kaba nyngkong ha ka Under 14, ka Shillong Sports Association kan ïakhun pyrshah ïa ka West Jaintia Hills ha ka por 10:30 baje mynstep. Katba ha ka semi final kaba ar pat kan long hapdeng ka Ri Bhoi pyrshah ïa ka Nongstoin ha ka por 1:00 baje nohphai sngi.
Katba ha ka jingïakhun semi final jong ki Under -16 pat, ka Shillong Sports Association kan ïa khun pyrshah ïa ka West Jaintia Hills ha ka por 10:00 baje mynstep katba ka Ri Bhoi pat pyrshah ïa ka Nongstoiñ ha ka por 12:30 mynsngi. Ki kynhun kiba jop ha kane ka sngi kin ïa kynduh pat ban ïa knieh ïa ka nam lahduh ha ka sngi Thohdieng.
