Nongstoiñ, Nailur 04: Namar ka jingmynthi ka tnad PWD halor ka jingjot rathai ka surok na Markasa shaduh shnong Mawphanlur kaba jngai kumba 5 kilomitar tam, ki nongshong shnong ha ka sngi balang ki la hap ban ïamih paidbah bad ban maramot hi katba lah.
U rangbah shnong jong ka Mawphanlur haba ïakren bad u nongthoh khubor, u la ong ba ka jingpynbeit ban maramot ïa katei ka surok, ka long namar ba kiba bun ki nongwan jngoh kai kiba kiew sha katei ka jaka, ki thnum namar ka jingsniew ka surok.
U la ong ba ka jingmaramot jong ki ïa katei ka surok, kam dei tang namar ba ki nongwan jngohkai ki thnum. Hynrei ki nongshong shnong katei ka thaiñ kum na Tiehdang, Mawkyrtung, Mawkohnoh, Mawphanlur, Lummyrsiang Markasa bad kiwei kiwei ki shnong, ki jynjar bha ha ka leit ka wan khamtam haba ki don kiba pang ba shitom, kiba hap ban leit phah sumar sha kiwei pat ki jaka.
U rangbah shnong u la ong ruh ba ka jingpynbeit ban maramot ïa katei ka surok ka long kaba kyrkieh, kumta na ki sawphew ar tylli ki longïing kiba don hapoh ka shnong, kim shym la lah ban ïapoi lut hynrei yn sa pynbeit biang ha kawei pat ka por ban ïa mih uwei shi ïing ban maramot biang ïa katei ka surok ha u bnai ban wan lada long kaba lah.
U la ong ba kumba ka sorkar ka shimkhia bad kheiñ kor ïa ki jaka jngohkai ha kiwei pat ki jaka, ka la dei ban shimkhia lem ban pynbha bad phah maramot noh kham kloi ïa katei ka surok. Namar kumba ka long ha kine ki sngi ka jingwan ki nongjngohkai ha Mawphanlur ka duna bha na ka daw jong ka jingbym biang ka surok.
U la kyrpad ruh ïa ki bor sorkar kiba peit ïa ka tnad jngohkai pyrthei ba kin da wan hi da lade shaduh Mawphanlur, da kaba ïaid lyngba katei ka surok, khnang ba kin ïohi dalade la ka surok ka bha ne ka sniew.
