Ban pynjur jingdawa, ïaid beit ka jingsangeh treikam shipor ïa ki ophis ha Mawsynram Block
Mawsynram, Nailur 04: Ki lai tylli ki shnat trei kam jong ka Khasi Students’ Union (KSU) kaba kynthup ïa ka KSU Lawbah Border Area Circle, KSU Balat Border Area Circle bad ka KSU Sawsymper Circle sa shisien ki la pynlong biang ïa ka jingpynsangeh treikam shipor ïa ki jaka treikam ne ki ophis kata ha ka 3 bad 4 tarik mynta u bnai hapoh jong ka Mawsynram C&RD Block na ka bynta ban kyntiew kyrdan noh ïa ka Mawsynram C&RD Block sha ka Civil Sub Division.
Ha kane ka jingpynlong jong ka KSU, na ka liang ki dkhot jong ka seng ki la leit ban jurip bad la lap ba baroh ki ophis treikam ki la khang lut kata naduh ka ophis jong u BDO, PHE, Forest, PWD (Roads), ICDs, FEDCO, Post Office bad kiwei kiwei ki jaka treikam kiba hap hapoh jong ka Mawsynram C&RD Block.
Namarkata, ka seng ha ka kyrwoh ba la phah da u bah Macdonald Marbaniang, General Secretary jong ka KSU Sawsymper Circle ka ai khublei kyrpang ïa baroh ki paidbah bad khamtam eh ïa ki nongtrei ophis kiba la ai ka jingkyrshan pura ïa kane ka jingpynsangeh treikam shipor na ka bynta ban dawa na ka sorkar ba ka dei ban kyntiew kyrdan noh ïa ka Mawsynram C&RD Block sha ka Civil Sub Division.
Ym tang kata, ka seng ka kyntu ruh ïa ka sorkar ba ka dei ban sngap ïa kane ka jingdawa ba shongnia jong ka KSU bad ki paidbah ban kyntiew kyrdan sha ka Civil Sub Division ïa ka Mawsynram namar ka dei ka C&RD Block kaba la slem tam hapoh jong ka jylla Meghalaya.
Shuh shuh ka KSU sa shisien kan sa ïoh ban ïa shong pyrkhat biang bad ki nongïalam kiba kynthup naduh ki nongïalam hima, nongïalam shnong, nongïalam Raid bad ki ‘riew rangbah jong ka dong ka thaiñ Mawsynram na ka bynta ban pynkhlaiñ ïa kane ka jingdawa Civil Sub Division ha ka 11/09/2024 ha ka por 11 baje mynstep ha Mawsynram.
“Ha katei ka sngi kan don ruh ka jingwah banner ha manla ki ophis sorkar, ki dong ki thaiñ bad ki shnong ba hap hapoh Mawsynram Block baroh kawei”, kane ka long katkum ka kyrwoh khubor ba la phah da u bah Macdonald Marbaniang, General Secretary jong ka KSU Sawsymper Circle.