Mar ïa phet u MDC sha ka NPP, jied thymmai ka Congress ïa ki nongïalam ha Mawkyrwat

Mawkyrwat, Rymphang 25: Ki nongïalam ba hakhmat bad ki nongkyrshan jong ka Indian National Congress (INC) hapoh ka Mawkyrwat Block Congress Committee (MBCC) ha ka sngi saitjaiñ jong ka taïew ki la ïoh ban lum ka jingïalang ba nyngkong ha Mawkyrwat la ban long kum kawei na ki jingïalang ban jied thymmai ïa ki nongkitkam jong ka INC Mawkyrwat Block Congress Committee.
Lah ban ong ba ka jingpynlong jong ka MBCC ïa ka jingïalang ka long kum shibynta ban jied ïa ki nongïalam ne ki nongkitkam jong ka INC ha Mawkyrwat Block namar ka jingleit snoh noh jong u bah Carness Sohshang, MDC ka Mawkyrwat Constituency ryngkat ki katto katne ki nongïalam sha ka National People’s Party (NPP) ha kine ki khyndiat sngi.
Shuh shuh ym tang kata ha kane ka jingïalang, watla ki nongkitkam jong ka INC ki la nangleit shakhmat sha kiwei pat ki party hynrei kum ki nongïalam barim jong ka INC kiba dang sah mynta ki la ïoh ban pdiang sngewbha ïa ka jingwan pynïasoh sha ka congress bad kita ki dei na ka Peoples Democratic Front (PDF) jong ka Mawkyrwat Zonal ba ka lamkhmat da u President barim ka PDF, South West Khasi Hills District.
Hadien ka jingïalang ka la don ruh ka jingpynthymmai ïa ki nongkitkam jong ka Indian National Congress (INC) Mawkyrwat Block ha kaba la jied President ïa u bah N. Tympuiñ, Vice-President ïa u bah Kyntiew Nongsiej, General Secretary ïa u bah Andreas Kharkongor, Chief Organizer ïa u bah Kynphamlin V. Kharlyngdoh, Chief Adviser ïa u bah Valentine Thyrniang bad kiwei ki nongkitkam ba hakhmat.
Ïa ka jingïalang ha kane ka sngi la pynïaid da u President u bah N. Tympuiñ, ka jingkren pdiang na u bah P. Wanniang, bad ki jingkren lyngkot na u Chief Adviser u bah Valentine Thyrniang, na u Chief Organizer u bah Kynphamlin V. Kharlyngdoh, na u bah Manuel Badwar, Secretary jong ka MPCC bad ka jingkren khublei na u bah Andreas Kharkongor, General Secretary jong ka INC MBCC.