Mar ïa dap 50 snem ka CMC Nongkohlew, pynïoh u MLA da ka kynroh ïa ka skul bad ïingmane

By Mawphor Editor On May 20, 2022

Shillong, Jymmang : Mar ïa dap 50 snem (Golden Jubilee) ka Don Bosco Secondary School bad ka CMC Nongkohlew u MLA ka Mawlai u Bah PT Sawkmie u la lah ban pynïoh ïa ka kynroh ka ban ker ban da ïa ka skul bad kumjuh ïa ka Ïingmane Katholik ka ba don ha Nongkohlew.
Na ka liang u MLA u la lah ban pynurlong ïa kaei kaba u la khlei bad kular ha u snem 2019 ha ka sngi plie pyrda ïa ka jingrakhe ïa ka Golden Jubilee jong ka skul bad ka CMC Nongkohlew. Ha ka jingïadon lang u rangbah balang bah Stephen Wanniang, u rangbah shnong bah A. Kharwaniang, ki nonghikai bad ki kiwei ki paidbah nongshong shnong jong ka Nongkohlew, u Bah PT Sawkmie u la pynpaw sha ki ba shen kin shna noh ïa ka kynroh, la kumno kumno naduh kane ka sngi Nyngkong ka ban wan.
Kumjuh na ka liang ka CMC Nongkohlew bad ka Don Bosco SS ki la pynpaw ïa ka jingsngewnguh haba ïa dei bad kane ka jingshimkhia jong u MLA na ka bynta ka jingbit jingbiang bad ka bha ka miat jong ki khynnah skul bad ka balang hi baroh kawei.
Ha ka jingkren na ka liang u Rangbah Balang u bah Stephen Wanniang u la pynpaw ba kane kaa dei ka sngi kaba ki da sngewkyndit ban ïohi ia u MLA bad kiwei kiba la wan thew wan woh na ka bynta ban tei noh ïa ka kynroh.
U la ong ruh ba ki sngewkmen shikatdei eh na ka bynta kane ka kynroh bad ngim lah ban siew kylliang, tang U Blei uba lah ban siew kylliang ia kane ka jinglehbha jong u MLA, ha ka ba u la kyntu ruh ïa ki paidbah nongshong shnong ba kin ym klet ïa ka jingleh bha jong une u nongmihkhmat ka thaiñ.
Kumjuh na ka liang ka headmastress jong ka Don Bosco SS ka kong D Pasi, nalor ka jingsngewnguh baka la pynpaw sha u MLA ka la ïathuh ruh ba dei ha ka sngi dap rakhe 50 snem ha u 2019, ba ki la pynpaw sha u MLA ïa ka jingdonkam ban tei ïa ka kynroh bad mynta ka la urlong.
Ka Nonghikai, kong B Rynjah ka la pynpaw ba man ki jingeh ba ki ïa kynduh ki ju ud sha u MLA kum u kpa bad ka la pynpaw ruh ba baroh shikatta ka skul long lyngkrang bym don jingker jingda bad ki khynnah haba ïalehkai ki poi sha surok bad la slem bha ki la angnud ïa kane ka kynroh.
Ka pynpaw ba kyrmen ba u MLA un nanglah ban trei shitom bad ban ïoh biang ïa ka jingjop ha ka ilekshon 2023. Katba u Bah Robert Kharwanniang, u rangbah balang barim haba pynïaid ïa ka jingïalang u la ïathuh ba ha u bnai Risaw mynta u snem kan don ka jingïaseng heh haba ïa dei bad ka Golden Jubilee.