Mad jingeh ki paidbah namar ka jingdheng kali ha ka surok Ichamati sha Bholaganj, Majai: AHAM

Shillong, Jymmang : Ka Seng A.Chik Holistic Awakening Movement (AHAM),Khasi Hills Zone, ka pynpaw ka jingsngewkhia ka ba jur ha ka ba ïadei bad ka jingdheng kali ka ba jur naduh na Ichamati shaduh sha Bholaganj, Majai, East Khasi Hills District, kata ka ba ha ka jingjngai ka ba haduh kumba 8 kilomitar ka ba la wanrah ka jingeh ka ba khraw ïa ki paidbah nongleit nongwan.
Ka Seng ha u kyrwoh lyngba u Labiush Areng, President ka Khasi Hills Zone ka la ong ruh ba kane ka jingdheng ka la wan jia namar ka jingbym shim khia jong ki bor sorkar khamtam na ka liang ka tnat pulit namar kam shym la don ka jingjurip bniah ha ka ba ïadei bad ka jingïaid jong ki trok na Ichamati sha Bholaganj, Majai.
Nalor kata ka seng ka la ong ruh ba na ka liang ki nongshong shnong jong kane ka thaiñ ki la hap ban mad ïa shibun ki jingeh ki ba man la ka sngi khamtam na ka bynta ki khynnah skul bad kumjuh ki ba pang ba shitom ki ba hap ban ïaid lyngba kane ka surok.
Katkum ki jingtip ba la ïoh na ki nongshong shnong jong ka thaiñ, ka seng ka la ong ba kane ka jingtuid jong ki trok ka ba la lam sha ka jing dheng kali ka dei namar ka jingpynkit ïa u mawshun, bad na ki bor sorkar khamtam ka tnat pulit kam shym la shim satia ïa kino kino ki sienjam ban tehlakam ha ka ba ïadei bad ka leit ka wan jong kine ki kali watla ki la jia ha ka jaka ka ba ki don.
Ka Seng ka la ong ruh ba kam pyrshah ha ka ba ïadei bad kane ka kam khaïi mawshun, hynrei ka jingsngewkhia ka jong ki ka long ha ka ba ïadei bad ka bha ka miat jong baroh ki nongshong shnong khamtam na ka bynta ki khynnah skul , ki briew ki ba pang ba shitom ki ba donkam ban leit shah sumar nalor kiwei pat.
Shuh shuh ka Seng ka la ong ba ka la don ka jingdheng kali ka ba la sdang naduh ka por 8:30 mynstep haduh 7:30 jan miet ha katei ka lynti surok bad ka ba la wanrah jingeh shibun ïa ki paidbah namar kane ka surok ka la shlei satang da ki trok kit mawshun bad ka ba la khanglad ïa ka leit ka wan jong ki riew paidbah.
Kumta na ka liang ka Seng ka kyntu jur ïa ka sorkar khamtam ïa ka tnat pulit ba kan shim khia halor kane ka bynta khnang ba kan pyllait ïa ki paidbah na ki jingeh bad ban shim ïa baroh ki sienjam ban weng ïa kane ka jingdheng kali ka ba la sdang naduh u bnai Kyllalyngkot tad haduh mynta.