Mar 30 persen ia ki Khasi -Jaiñtia bad Garo, 27 persen ia kiba duk, tyrwa u MLA Shillong South sha ka EC

Shillong, Naitung 15 : Ka South Shillong Advisory Committee (SSAC) hapoh kajingïalam jong u MLA jong ka Bah Sanbor Shullai hynne ka sngi Nyngkong u la leit ban ai jingmut lang sha ka Expert Committee halor ka State Reservation Policy hadien ba ka sorkar ka ailad ïa baroh ban ai jingmut halor katei ka bhah thungkam thungjam.

Haba kren bad ki lad pathai khubor, u Bah Sanbor ula ïathuh ba ha katei ka jingai jingmut sha ka Expert Committee kum ka kynhun ki la tyrwa ban bhah  30 persen ïa ki Khasi – Jaintia bad 30 persen ïa ki Garo katba 27 persen pat na bynta kito kiba kham duna ka ïoh ka kot lane ki  economically weaker section (EWS).

“Kumta na ka liang ka South Shillong Advisory Committee ha ryngkat ka jingsyllok lang bad ki kynhun bapher bapher ka la tyrwa da ka bhah thungkam kaba long katkum ka khanasamari jong u 2011 kaba ïaid ryngkat ru bad ka roster system kaba pyntreikam da ka sorkar,”  ong u Bah Sanbor.

Nalorkata, u Bah Sanbor u la ong ruh ba nalor katei ka bhah thungkam ba mar 30 persen ïa ki Khasi-Jaintia bad 30 persen ïa ki Garo, 27 persen ïa kiba duna ha ka ïoh ka kot, ka Committee ka tyrwa ruh ban mang mar 6 persen ïa ki ST/SC bad OBC bad 7 persen pat kyllum lang ïa baroh (unreserved).

Haba ïadei bad katei ka 27 persen ka bhah na bynta kiba kham duna ka ïoh ka kot, ka kynhun ka la ong ba 87persen na kitei dei ban mang ïa ki EWS jong ka Khasi-Jaintia bad Garo katba kiba tam pat dei na bynta kiwei kata 6persen ïa ki ST,SC bad OBC bad 7persen pat kaba ailad kyllum lang ïa baroh khnang ba kito ki nongkyndong bad kiba kham duna ki lad ha ka ïohkam ïohjam kin ïoh jaka lang.

Katkum ka jingong jong u Bah Sanbor, kitei kiba hap ha ka thup kiba duna ka ïoh ka kot ki long naduh ki ba haiing jong kiba don ha ka thup BPL, ba niah kali, ba die jingdie madan, trei iing briew, bylla katba ïoh bad kiba trei contractual, ki bahaiing jong ki Asha, Anganwadi, ki nongtrep bad ki nongbylla.

“Na kine baroh, 10 persen pat dei ban mang na bynta kiba don jingthut ha ki dkhot met bad kito kiba paw ha ki kam ïalehkai bad ki sap ba kyrpang ba ïadei bad ka jingpynneh ïa ka kolshor,” u la ong.

Nalorkine, u la ïathuh ba ki ai jingmut ruh ba dei ba kynthup lang ïa ki bar jyll kiba la heh la san bad long trai  shnong ha ka thup ki OBC bad na bynta kito kiba dei hok ban ïoh ïa ka Schedule Caste dei ban kynthup ha ka thup SC.

Ula ong, ba ka advisory committee kala ai jingmut ruh ba lada ym don kino kino ki kyrtong kiba dei na kiwei pat ki ST,SC, OBC bad unreserved category ha kano kano ka district ïa kitei lah ban pyndap da kito kiba wan na ki longiing kiba duk kiba na ka jaidbynriew Khasi- Jaintia ha baroh ka Khasi bad Jaintia hills (kynthup ïa ka Ri-Bhoi district) bad ki Garo hapoh ka Garo Hills na ka bynta ki kam ha ki district level ne sub-division

Shuh shuh la ai jingmut ruh ba ha ki kam kiba die ha ki distrik lane sub division, na ka bhah kaba long 87 persen haduh 50 persen dei ba mang ïa kiba wan na ki longiing ba duk kiba dei na ka  Khasi-Jaintia ha baroh ka Khasi bad Jaintia Hills district kynthup ïa ka Ri-Bhoi district  bad ki jaidbynriew Garo ha Garo Hills.

Nalorkata, u la ong ruh ba ka Committee ka ai jingmut ruh ba ïa katei ka bhah thungkam dei ban pynthymmai ne peit bniah man ka 10 snem.