Shillong, Nailar 12 : U MLA ka Mawlai Konstitwensi u Bah Process T Sawkmie ha ka sngi Palei ka 11 tarik u Nailar u pyntip ba u la dep mang 4 lak tyngka na ka MLA skhim jong u na bynta ban shna pynheh ïa ka madan phutbol ha Umpling Umjathang, Mawsiatkhnam, kum shi bynta ban ban kyntiew ïa ka phutbol hapoh ka thaiñ.
Haba kren ha ka jingïalang ba lyngkot u Bah PT Sawkmie, u pynpaw ïa ka sngewkmen ban ïohi ïa ka jingïaid shaid shaid shaphrang shakhmat ka jingpyntrei ïa ka madan bad ka thong jong u hi ka long ban ïoh ïa ka madan katkum ka standard ba mynta.
U pynpaw ruh ba u ïohi ïa ka jingthrang jong ki samla ha kine ki sngi ba mynta ba kin kiew ha ka ïalehkai phutbol bad don ruh bun ki khynnah ha kine ki sngi kiba leit shah hikai ha ka Baichung Bhutia Academy bad kiwei de ki academy kiba dei ki khynnah na ka thaiñ Mawlai.
Ha kane ka sngi u Bah PT Sawkmie u la ai ruh ïa ka jingïarap song pisa sha ka seng ki Rangbah Katholik ka Umjathang na ka bynta ban ïadonbyntalang ha ka jingïaseng kaban long ha ka 14 tarik u Nailar, 2022, ka sngi U Blei.
Na ka liang u rangbah dong ka Umpling Umjathang u Bah Kynsaibor Nongphud haba ai jingkren u la ai khublei ïa u MLA halor kane ka jingïarap pisa bad u ïathuh ba ki la dep pynlut 2 lak haba shna ïa ka madan phutbol bad mynta kin shna ïa ka madan sa na ka 2 lak kaba sah.
Ha kane ka sngi la ïoh ruh ïa ka jingkren na Bah K. R Lyngdoh, jong ka seng rangbah Katholik, na Bah Khraw Lyngdoh bad na kiwei kiwei kiba la pynpaw ïa ka jingsngewnguh ïa u MLA halor ka jingnoh synñiang jong u.
Ha shuwa kane u MLA u la jurip ruh ïa kawei ka kyntoit ha Wahkdait, Mawtawar na ka bynta ban pynbiang bor ding ha ka jingdon ryngkat ka Area Manager ka Kong J. Rymbai, ki rangbah na Mawtawar bad kiwei.
U la leit sha kane ka dong hadien ka jingud jingnam jong kiba bun ki donkam ïa ka bording, namar baroh shikatta kim pat don ïa ka bording bad ha kane ka sngi ki la jurip ruh ïa ka jaka ban buh ïa u transformer.
