Mawkyrwat, Nailur 18 : U District Magistrate jong ka South West Khasi Hills District, Mawkyrwat, u la pynbna ba la pynjari da ka Section 144 CrPC kaba la mana ban pynlong ïa ki jingïakob khwai dohkha bad jingïalang paidbah ha ki pung dohkha kiba don hapoh 500 mitar ka jingjngai na surok PWD.
Ïa kane ka hukum la pyntreikam namar ba la ïoh jingtip ba don katto katne ki ‘riew shimet bad ki kynhun kiba ju mlien ba pynïaid ïa ki jingïakop khwai dohkha/jingïalang paidbah ha ki pung dohkha ki ba don hajan ki surok PWD (Roads), kaba pynthut ïa jingïaid ki kali bad ka pynthut ruh ïa ka ïaid ka ïeng bad leit ka wan jong u paidbah.
Katkum katei ka kyndon, u District Magistrate jong ka South West Khasi Hills District, Mawkyrwat, ha ka hukum ba la pynmih la mana ïa baroh ki jait jingïakop khwai dohkha bad ki jingïalang paidbah ha ki pung dohkha kiba don hapoh 500 mitar ka jingjngai na ki surok PWD (Roads).
Ki bor distrik ki la pyntip ruh ba kino kino kiba shah ktah ha katei ka hukum ba kin leit mih sha ophis u District Magistrate ka South West Khasi Hills, Mawkyrwat lane sha kino kino ki bor ba dei peit. La pynbna ruh ba katei ka hukum kan treikam mardor tad haduh ban da pynbna da kumwei pat.
Kumban shu kdew hangne ba ha ka jingïakob khwai dohkha kaba long ha pung Pamphyrnai West Khasi Hills, ka la wanrah pynban ïa ka khubor ba sngewsih, ha kaba tang na ka daw ka jingsahkut jong ka kali bad khlem poi jaka sumar ha ka por kaba biang, kawei ka longkmie ba dang armet ka la hap ban kha ïa i khun hapoh ka kali bad tang hadien katto katne por i khunlung i la khlad noh na kane ka sla pyrthei.
Kane ka la jia ha ka sngi Saitjaiñ ha Pamphyrnai ha kaba ki rawon na kylleng ki jaka ki la tuid sha ka jaka ïakop khwai. La ong hadien ba la pynbna ïa ka tiket jong ka khalai nusip bad ïoh kali (lucky draw) ha ka por 2:00 baje eiei nohphaisngi ha shilynter jong ka surok bah National Highway kaba don harud jong katei ka pung, ka surok ka la shlei smam da ki paidbah bad ki rawon kiba la ïa mih sha surok bad kane ka la wanrah ïa ka jingsahkut kali kaba la neh palat bun kynta haduh da kem iong reiñ syndon ka suiñ bneng.
Kane ka jingsahkut kali ha surokbah National Highway marjan bad ka pung Pamphyrnai kam dei shuh ka sien kaba nyngkong, hynrei manla ka por ba don ka jingpynïakop khwai. Hynrei, ha ka sngi saitjaiñ ka jingbun briew bad ki kali ka la long ar shah bad lai shah ïa kaei kaba ju long baroh shikatta. Dei na kata ka daw ka jingsahkut ka leit ka wan ka la long kaba jur bha bad ka la neh ruh da ki bun bun kynta haduh da dum syndon ka suiñ bneng.
