New Delhi, Nailur 18: Ka Union Cabinet ne ka kynhun Myntri jong ka Sorkar pdeng, mynta ka miet ka la mynjur ban pdiang ïa ka Women’s Reservation Bill lane ka aiñ ban bhah kyrpang 33% ïa ki kynthei ban long ki nongmihkhmat ha Parliament bad ha ki Assembly.
Ki khubor na Delhi ki ïathuh ba ka Kynhun Myntri ka la mynjur ïa kane bad ka lah ban wanrah ïa kane ka Bill ha ka Dorbar ba kyrpang kaba la dang mynta ka sngi.
Lada kane ka Bill ka kylla ka Act ne ka Aiñ, kaba mut baroh ki ïingdorbar Thawaiñ ha ri India naduh ka Rajya Sabha, ka Lok Sabha bad ki Legislative Assembly kin hap mang kyrpang 33% ki Seat na ka bynta ki Kynthei. Kane ka mut ba ha kine ki 33% yn nym shah ïa ki shynrang ban ïaleh elekshon.
Ha Meghalaya ka Assembly ka don 60 Seat bad lada kheiñ 33% ka mut kan don kumba 20 Seat ne 20 tylli ki Constituency ban mang kyrpang na ka bynta ki Kynthei.
Ha ka jingshisha ka jingmang 33% ban long nongmihkhmat kadei ka mat kaba la ïakren la slem bha bad ka la mih ruh ha Parliament ha ka por ba synshar ka Congress. Hynrei ka la jah noh khlem poi shano shano ruh.
