Mana ka Elaka Sutnga ban shna LHC bad ban register ïa ki jaka ba la buh da ki men ba rim

Khliehriat Lber 18: Ka ophis treikam jong u Acting Doloi Elaka Sutnga, ka pynpaw ka jingsngew khia halor ka jingai syrnot Land Holding Certificate ka ophis jong ka Jaiñtia Hills Autonomous District Council sha ki briew shimet kiba leit ban register ïa ki jaka kiba hap hapoh elaka Sutnga kiba dei ki jaka ba la buh kyrpang da ki men ba rim, kiba dei ki longshwa manshwa na ka bynta ki khun ka elaka ba kin pyndonkam.
Katkum u kyrwoh ba la phah da u Secretary Elaka Sutnga, u bah Lappideris Pala, la ong ba ka elaka ha ka jingialang ba la pynlong ha ka 11 tarik mynta u bnai lber, ka pynkynmaw biang ïa baroh ba ka Elaka Sutnga ka mana ban register ne ban shna Land Holding ïa ki jaka ba kynthup ka Umthe, Lum Lyndon, Moo Iong, Sha Pra, Sakwa, Tongsko, Bri Muliat Khaddum, Umsynrem, Umsngad, Kdait, Umsngad Tyrko, Wah Shympe,Khlaw Salang, Um Kboh, Latngiar, Bri Shyrmang, Khlaw na Shnong Sakhain, Khlaw na Umtyra, Nongsning ter ter haduh Lunar, Lum Syngket Moopad UmladoNadang, Bom Masi Umsatad pdang Tyngkong Waheh Saphoh.
La ong ruh ba”Ha kaba iadei bad ka jingiakut ban pynneh pynsah ïa ki jaka kiba ka elaka Sutnga ka la kdew hangneng, ka Elaka Sutnga naduh ka 24 tarik u bnai ïaïong jong u snem 2017 ka la dep buh da ka jingthoh bad pynkynmaw ïa ka office ba donburom jong ka Jaiñtia Hills Autonomous District Council, ba ym bit ban ai Land Holding Certificate ne ban nym pdiang satia ban register ïa kitei ki jaka kumba la kdew hangeng hynrei sngewsih ban ong ba ka ophis jong ka JHADC pat ka dang ai LHC sha ki briew shimet, namar kitei ki jaka ki dei kiba la buh da ki longshwa manshwa na ka bynta ki khun jong ka elaka ban rep ban riang bad na ka bynta kiwei pat ki jingdonkam jong ka elaka”ong u kyrwoh.
Ka elaka ha ka jingïalang jong ka Executive committee kaba pynlong ha ka 11 tarik mynta u bnai lber 2024 ka la pynkynmaw biang ba kitei ki khlaw elaka kim lah ban long ki khlaw shimet, la ïakut ruh ba baroh ki kyndon jong ka elaka ki dang iaineh bad kim pat kylla haduh mynta mynne naduh ba la buh da u longshwa manshwa na ka bynta ki khun jong ka elaka ban rep ban riang bad na ka bynta kiwei pat ki jingdonkam jong ka elaka.
Kumta la kyrpad ïa kino kino kiba la don ne ioh ïa ki Land Holding Certificate (LHC) kiba hap hapoh kitei ki jaka ki dei ban pynphai noh ïa ki LHC jong ki sha ka ophis jong ka elaka Sutnga bad la ai por ba dei ban pynphai hapoh ka shi bnai, lym kumta ka elaka kan sa shim da kwei pat ka lynti
Shuh shuh na ka ophis jong u Acting Doloi ka la buh ïa ka jingkyrpad ïa baroh ki Rangbah Shnong jong ki shnong kiba hap hapoh ka elakaSutnga ba ki dei ban pyntip sha ki paidbah nongshong shnong jong ki ïa ki jingpyntip kiba katkum ki shithi ban la dep phah sha phi ki Rangbah Shnong.