Maham u District Election Officer ka EJHD ïa kiba tyrwa bad shim pisa ha ka por ilekshon

Khliehriat, K’lyngkot : U District Election Officer ka East Jaiñtia Hills District, da kane u pyntip ba hadien ka jingpynbna ïa ka tarik na ka bynta ban pynlong ïa ka ilekshon assembly ha ka jylla, kumta ruh u pyntip paidbah ba katkum ki kyndon section 171 B jong ka Indian Penal Code la khang pyrshah ïa kino kino ki briew ba kin tyrwa ne shim pisa ne da kiwei pat ki jingai sngewbha ha ka por ba ka jingpynlong ïa ka ilekshon, bad lada lap kin ngat ha ka jingshah pynshitom da kaba shah set phatok haduh shi snem kynthih, ka kuna lane baroh ar. Nalor kata kakum ki kyndon section 171 C ka Indian Penal Code, kino kino ki briew kiba byrthen pynmynsaw ne da kumwei pat ïa kino kino ki kyrtong ne ki nongthep vote lane ïa kino kino ki briew kin ngat ha ka jingshah set phatok kaba haduh shi snem kynthoh, ka kuna lane baroh ki ar jingpynshitom.
Na ka bynta ka jingïaid beit ha ka jingpynlong ïa ka ilekshon la thaw ruh ïa ki flying squad ba kin rejistar case pyrshah ïa ki nongai bad ki nongshim ka pisa ne kiwei pat ki jingai sngewbha, kumjuh ban shim ka jingpynshitom pyrshah ïa kito kiba donkti ha ki kam byrngem byrsit pyrshah ïa ki nongthep vote.
Kumta ruh la kyrpad ïa baroh ki nongshong shnong ba kin kiar ban shim pisa ne kiwei pat ki jingai, bad lada jia ba don kiba tyrwa pisa lane lada ioh jingtip ba don ki jingjia ba shah byrngem ne ki jingpyntieng pyn syier ïa ki nongthep vote ki dei ban pyntip sha ka Complaint Monitoring Cell jong ka district da kaba phone sha une u toll free nombor 1950 u bym donkam ban siew ei ei ha kano kano ka por. La thaw ïa kane ka Complaint Monitoring Cell jong ka district na ka bynta ban pdiang ïa ki jingujor.