Maham ka KSU ïa ka Longkmie Gas Agency ban ym sam duna ïa ki Tyndong Lyer shet jingshet

Shillong Jylliew 29 : Ka Khasi Students’ Union Laban Circle mynta ka sngi Palei ka la leit ban ïa kynduh ïa ki nongpynïaid jong ka Longkmie Gas Agency kaba don ha Laban Last Stop halor ka jingïoh duna ki paidbah ïa ki tyndong Gas.
Ha ka jingleit iakynduh ïa ki nongpynïaid ka Longkmie Gas Agency, ia ka seng KSU la lamkhmat da u President Samla Reuben Najiar & Samla Jason Laloo General Secretary ryngkat ka jingïasynran lang jong ki para nongïalam bad ki dkhot.
Ka KSU ka la pynsngew sha ka Longkmie Gas Agency ïa ki jingujor jong ki paidbah jong ka thaiñ Laban ha kaba ïadei bad ka jingïoh duna ïa ki Tyndong Gas ha ka shi snem kata tang 10 tylli kaba ki Gas Agency ki dei ban pynbiang ym duna ïa ka 12 tylli ki tyndong Gas ha ka shi snem.
Ka KSU Laban Circle ka la pyntip ba ha ka jingleit khynra ha ki bnai ba la dep ïa ki dukan Bam (Sha & Ja) halor ka khuid ka suba kata ha ka 13 tarik Jymmang 2023 la lap ruh ba ki dukan bam ki ju pyndonkam da ki tyndong gas kiba dei ban shet ban tiew ha ki ïing bad kane ka long pyrshah kat kum ka aiñ.
Na ka liang ka Longkmie Gas Agency ka la pynsngew ïa ki jingeh kaba ki ïakynduh bad ka la kular ban pynbit pynbiang ïa ki jingduna kaba ki paidbah ki shem bad ka la pynshai ba kam don kano kano ka jingdie tuh ïa ki tyndong gas.
Ka KSU ka la maham tyngeh ïa ka Longkmie Gas Agency ba kam dei ban pynduna ïa ki tyndong gas kaba dei ban poi sha ki longïing jong ki paidbah nongshong shnong ka Laban.